Ахъшэр зыхалъхьэну унэтIыныгъэхэр

Инвестицэ ахъшэ нэхъыбэ зыхэплъхьэ хъунухэмкIэ Къэбэрдей-Балъкъэрым ещанэ увыпIэр КИФЩI-м щиIыгъщ - сом мелард 24-м щIигъу къыпхуешэлIэнущ. ИкIи, экспертхэм зэрыжаIэмкIэ, а ахъшэр зыхуэбунэтI хъунур псори зэхэту тонн мин 20-м нэблагъэ пхъэщхьэмыщхьэ зыщIэхуэ хъумапIэхэр ухуэнымрэ зэкIэщIэсауэ хасэу къагъэкI мыIэрысейхэмрэ зехьэнырщ.

Япэ увыпIэр Кавказ Ищхъэрэм щиIыгъщ Ставрополь крайм. Абы иIэщ фейдэ къуиту сом мелард 79-рэ зыхэплъхьэ хъун IэнатIэхэр, етIуанэр Осетие Ищхъэрэ – Аланиерщ: сом мелард 37-рэ къыпхуешэлIэнущ а щIыналъэм.

Кавказ Ищхъэрэм и мэкъумэш-промышленнэ комплексым зегъэужьыным пыщIа пэхуэщIэхэм инвестицэ ахъшэу сом меларди 192-рэ къыхашэнущ 2030 - 2031 гъэхэм ирихьэлIэу. ЛэжьыгъэкIэ абыхэм къыщызэрагъэпэщынущ цIыху мини 10-м нэблагъэ. Минводы къалэм иджыблагъэ щекIуэкIа Кавказ инвестицэ зэхуэсышхуэм ар щыжиIащ «Урысеймэкъумэшбанкым» и унафэщIым и къуэдзэ Константинов Денис.