Къэрал гулъытэ щагъащIэркъым

УФ-м и IТ-технологие IэнатIэм щылажьэхэм худэчых зыхэт кредиту банкхэм къыIаха ахъшэм я Iыхьэ гуэрхэр яхуэпшыныжыным сом мелард 60,8-рэ трагъэкIуэдэнущ. Дэфтэрым иджыблагъэ Iэ тридзащ Урысей Федерацэм и Правительствэм и УнафэщI Мишустин Михаил.

УФ-м и Правительствэм и ахъшэ гъэтIылъыгъэм къыхэкIынумкIэ кредиту мин 91,5-м нэхърэ мынэхъ мащIэ субсидие пхуэщIынущ, ипэIуэкIэ къыIахахэри, дызэрыт илъэсым и кIэм нэсыху къыIахынури хэту.

IТ-технологие IэнатIэм пыщIа IуэхущIапIэхэм ящыщу аккредитацэ зиIэхэм я лэжьакIуэхэм худэчых зыхэт кредитхэр етынымкIэ УФ-м и Правительствэм къыхилъхьа программэр 2022 гъэм щегъэжьауэ мэлажьэ икIи ар хуэунэтIащ а IэнатIэр дэIыгъынымрэ IэщIагъэлIхэм защIэгъэкъуэнымрэ. Псалъэм къыдэкIуэу, худэчых зыхэт ипотекэ кредитыр къыIах хъунущ зи ныбжьыр илъэс 50-м щIимыгъуахэм. Абы и ставкэр илъэс пIалъэкIэ къэбгъэлъагъуэмэ, проценти 6-м щIигъуркъым. Къэрал субсидие зратынухэм хиубыдэнур худэчых зыхэт кредиткIэ псэупIэ къэзыщэхуну сом мелуани 9-м нэблагъэ банкхэм къыщызыщтахэрщ.

Ипотекэ кредитыр ират къат куэду зэтету яухуэ унэщIэхэм, е хьэзыр хъуахэм фэтэр къыщащэхун, е унэ езыхэм ящIын папщIэ.

УФ-м и Правительствэм иджыблагъэ къищта унафэм теухуауэ Мишустин Михаил жиIащ IТ-технологие IэнатIэм щылажьэхэм защIэгъэкъуэным ехьэлIауэ лэжьыгъэ пыухыкIахэр зэрырагъэкIуэкIыр. ЖыпIэнурамэ, программэр зэрырагъажьэрэ IэщIагъэлIу мин 84-м худэчых зыхэт кредитхэр процент цIыкIухэмкIэ иратащ икIи мы гъэм а Iуэхугъуэхэм щхьэкIэ къэрал бюджетым сом мелард 59-м нэблагъэ къыхэкIынущ.

«IТ-технологие IэнатIэм щылажьэхэм етт къэрал дэIэпыкъуныгъэхэм адэкIи пытщэнущ икIи абыхэм я фIыгъэкIэ ди цIыхухэм я псэупIэхэр ирагъэфIэкIуэфынущ», - къыхигъэщащ Мишустин Михаил.