Лымрэ джэдыкIэмрэ хохъуэ

Къэбэрдей-Балъкъэрым и Iэщыхъуэхэм лырэ джэдкъазылу къалэжьым (псэ­у­уэ шэчауэ) и куэдагъым хагъахъуэ зэпытщ. ЖыпIэнурамэ, 2025 гъэм и щIышылэм - мэлыжьыхьым апхуэдэу къыщIагъэкIам процент 14,5-кIэ хагъэхъуащ е тонн мин 15,5-рэ хъуащ. Апхуэдэ хъыбархэр иджыблагъэ зэбгригъэхащ Росстатым.

Къыхэдгъэщынщи, лыуэ псори зэхэту къалэжьам щыщу тонн мин 12,6-р джэдкъазылщ икIи нэгъабэ и апхуэдэ пIалъэм щыIа бжыгъэхэм елъытауэ процент 13,3-кIэ абы хэхъуащ, тонн мини 2,2-р - былымылщ (процент 18,3-кIэ нэхъыбэщ), тонн мин 0,7-р - мэлылрэ бжэныл­рэщ (процент 27,1-кIэ нэхъыбэщ). 
Мыдрейуэ, республикэм и фермер, уней IуэхущIапIэхэм джэдыкIэу къыщрахым и куэдагъми хагъахъуэ. Псалъэм къыдэкIуэу, Кавказ Ищхъэ­рэм СтатистикэмкIэ и управ­ленэм къызэритамкIэ, ды­зэрыт илъэсым и япэ мазищым фермерхэмрэ уней IуэхущIапIэхэмрэ зэгъусэу джэдыкIэ мелуан 1,7-рэ кърахащ икIи нэгъабэ и апхуэдэ пIалъэм яхузэфIэкIам нэхърэ проценти 7,7-кIэ ар нэхъы­бэщ. 
Къапщытэж пIалъэм къриу­быдэу республикэм и мэкъу­мэш, фермер, уней IуэхущIапIэхэм, унагъуэхэм псоми зэхэту джэдыкIэ мелуан 44,6-рэ къыщрахащ е 2024 гъэм и апхуэдэ пIалъэм щыIа бжыгъэхэм проценти 102,8-кIэ хуэкIуэу.