Зеубгъу къэрал дэIэпыкъуныгъэм

2025 гъэм и щIышылэм - мэлыжьыхьым къриубыдэу  УФ-м и хьэрычэт IэнатIэ мащIэмрэ курытым-рэ къэрал дэIэпы­къуныгъэу сом мелард 236-рэ иратащ. Ар сом мелард 70-кIэ нэхъыбэщ нэгъабэ и апхуэдэ лъэхъэнэм нэхърэ. 2024 гъэм МСП Корпо­рацэм а IэнатIэхэм къэрал дэIэпы­къуныгъэу яху­хихар псори зэхэту сом триллион 1,2-рэ хъуащ. УФ-м экономикэ зыужьыныгъэмкIэ и министр Решетни­ков Максим ар щыжиIащ МСП Корпорацэм и уна­фэщIхэм я советым иригъэкIуэкIа зэIущIэм. 

«УФ-м и Президентымрэ Правительствэмрэ я нэIэ щIэт зэпытщ хьэрычэт IэнатIэ мащIэмрэ курытымрэ. Правитель­ствэм и комиссэм мыгувэу щызэхуэсыну зэIущIэм къыщаIэтынущ МСП-м зегъэужьыным ехьэлIа Iуэху куэд, иужькIи Санкт-Петербург щызэхэтыну дунейпсо экономикэ зэ­хуэсышхуэм дызы­теп­сэ­лъы­хьы­нухэм я нэхъыщхьэу ар щытынущ. Кредит къэпщтэ­ну гугъу щыхъуа иджырей зэманым МСП Корпорацэм хьэрычэт ­IэнатIэ мащIэмрэ ку­рытымрэ сом триллион 1,2-кIэ защIигъэ­къуащ нэгъабэ. Дызэрыт илъэсым и япэ мазищым а дэIэпы­къуныгъэм ­процент 30-кIэ щIрагъэгъуащ, абы ипэ ита илъэсым яхузэ­фIэкIам елъы­тауэ», - къыхигъэщащ Решетниковым.
Къапщытэж пIалъэм къриубыдэу Къэбэрдей-Балъкъэрым и хьэрычэт IэнатIэ мащIэмрэ курытымрэ къэрал дэIэпыкъу­ны­гъэу яIэрыхьар сом мелард 0,33-рэ хъуащ е нэгъабэ и апхуэдэ пIалъэм нэхърэ проценти 2-кIэ нэхъыбэу.
Къэрал дэIэпыкъуныгъэхэр УФ-м и МСП-м и IэнатIэхэм ират «Зэхьэзэхуэр зи лъабжьэ экономикэ лъэщ» лъэпкъ пэ­хуэщIэм ипкъ иткIэ икIи 2030 гъэм ирихьэлIэу сом триллион 1,3-м ар нэгъэсын мурадхэр щыIэщ.