Ныбжьэгъугъэмрэ лэжьыгъэмрэ

9 июня, 2025 - 11:22
ЦIыхум и гъащIэм мыхьэнэшхуэ щиIэщ ныбжьэгъум, къыдэгъуэгурыкIуэ цIыху пэжым. Къуныжь Алимрэ Думэн Мурадинрэ зэрызэрыцIыхурэ куэд щIащ. Зэдэлэжьэн и пэжкIэ, Алим Музыкэ театрым и артисту, Мурадин «Кабардинка» ансамблым къыщыфэу щытащ. Абы лъандэри зэнэIуасэщ, зэныбжьэгъущ. 
- Псалъэм я нэхъ лейхэр къапщтэми, си фIэщ хъуркъым Алим хужыпIэну пхурикъуну. Гъуазджэм, щэнхабзэм зэрыхэтым, и утыку итыкIэм, и хьэл-щэным теухуауэ уеплъмэ, щапхъэщ. Алим куэд театрым диIэкъым. Сэ собж нэхъ актерыфI дыдэу Къэбэрдейм исхэм, Алим япэ имытмэ, я ужькIэ къэмыкIуэу. И актер Iэзагъми, Iуэху бгъэдыхьэкIэми, лэжьэкIэми - псоми зы гъэщIэгъуэнагъ гуэр хелъхьэ мы цIыхум, - дыщегъэгъуазэ Мурадин. - ИтIанэ, сыт хуэдиз лэжьыгъэ къызэбнэкIами, уи гур сценэм етауэ щытмэ, ар артистым дежкIэ фIы дыдэщ. Алим, къапщтэмэ, зыгъэпсэху иIэкъым. Сыт ар адрей артистхэм щIахуэзмыгъадэр?! Иджырей зэманым утыку итыкIэм и хабзэхэми захъуэжащ. Абы къыхэкIкIэ артистыр жанр лIэужьыгъуэ псоми хэзагъэу щытыпхъэщ. Иджыпсту сыт тлъагъур? «Дэ ды-артистщ» жаIэри, куэд къоунэху, зы жанр кIапэ гуэрым теуварэ абы пхутемыкIыжыну. Лэгъупыкъур плъыфэбэу зэрызэхэтым хуэдэу, артистми и къарур зэмыщхьу лъэныкъуэ куэдкIэ игъэлъэгъуэфын хуейщ: утыку къихьамэ - къэфэфу, усэ къеджамэ - гум хигъэхьэу, Алим нэсри къэсыжауэ артистщ!
Къуныжьымрэ сэрэ утыкум роль зэхуэмыдэ куэди щызэдэдгъэзэщIащ, си гушыIэ Iэджи ар къеджащ, си гугъэщ иджыри зыкъом къеджэну... УрохьэлIэ актер хьэлъэхэм, уздэмылэжьэфхэм. Алим апхуэдэкъым. Абы сыщыдэджэгум деж сотынш, сыту жыпIэмэ, сэ сызыхуейр Алим ещIэ, езыми а дакъикъэм жиIэнур занщIэу къызгуроIуэ - и къэплъэкIэ къудеймкIэ. ЦIыху тыншщ. 
Адыгэ гупсысэкIэ диIэн хуейщ, жытIэ хъуащ щIэх-щIэхыурэ. Ар хэлъщ Алим. Зыгуэр и лъэпкъым тегужьеикIамэ, ар етIуанэщ.
Дэтхэнэ цIыхуми езым и хьэл-щэн иIэжщ, фIыи Iеи я лъэныкъуэкIэ. Ауэ псом нэхъыщхьэр цIыхум ухэзэгъэнырщ, гуп хэтыкIэ пщIэнырщ, губзыгъагъэ къыбдалъэгъунырщ.
Алим цIыху удыхыхьэну уасэ иIэкъым. Сыт хуэдэ гуп хэмыхьами, пщIэрэ щхьэрэ иIэу къыхокIыж, сыт хуэдэ лъэIукIэ зыхуумыгъазэми, зэрыхузэфIэкIкIэ зыкъыпщIегъакъуэ. Аракъэ цIыху нэс жыхуаIэр?! 
ГъащIэ щыхъукIэ, фIыри Iейри зэпыщIащ. Хэзыгъэплъэн илъэгъуащ Алим, гъуэгуанэ гугъуи къыщикIуа къыхуихуащ. И IэщIагъэкIи, и лэжьыгъэкIи ар япэкIэ зыгъэкIуэтэн иIакъым. Абы езым и пщIэр къилэжьыжыфащ. ЗэрыжысIащи, Къуныжьыр зыхуэлажьэр лъэпкъращ. Артистыр щIэпсэур зы закъуэщ: зы илъэс 50 дэкIа иужькIи цIыхум ягу къинэжынырщ. Алим пщIэншэрылажьэ хъуакъым, цIыхубэм деж лъытэныгъэрэ пщIэрэ щиIэщ. Абы и гуащIэр инщ: ар цIыкIуми инми фIыуэ къацIыху, къалъагъу. 
БАГЪЭТЫР Луизэ.
  • 11 просмотров
Поделиться: