ЩIэблэ лъэрызехьэ

9 июня, 2025 - 12:36
«Динамо»-м и ныбжьыщIэ» фIэщыгъэр зэрихьэу дзюдомкIэ щIыналъэхэм я зэхьэзэхуэ Налшык къалэм и «Гладиатор» спорт комплексым щекIуэкIащ. Абы щызэпеуащ Къэбэрдей-Балъкъэрым, Осетие Ищхъэрэ – Аланием, Ингушым, Шэшэным, Дагъыстэным я спортсмени 138-рэ.
Ди республикэм и бэнакIуэхэм ящыщу килограмм 55-рэ зи хьэлъагъхэм я деж япэ увыпIэр къыщихьащ Унэж Темырлан, Бэч Анзор абы етIуанэ щыхъуащ, Темрокъуэ Идар ещанэщ. Пщыбий Амир дыщэ, Iэрыпщэ Къантемыр дыжьын, Атэбий Темырлан домбеякъ медалхэр къыщахьащ килограмм 60 зи хьэлъагъ бэнакIуэхэм я деж. 
Килограмм 66-рэ хъухэм Къамбий Сэфарбий къытекIуэн къахэкIакъым. Бондаренкэ Николай а гупым ещанэ увыпIэр щиубыдащ. Шыкълъашэ Елдар щылъэщащ килограмм 73-рэ зи хьэлъагъхэм я деж икIи дыщэ медалыр зыIэригъэхьащ, ещанэ увыпIэр Къашыргъэ Мухьэмэд зыIэщIигъэкIакъым. Килограмм 8I-рэ зи хьэлъагъхэм я деж дыжьын медаль къыщихьащ Мизиев Хьэжмусэ, ЦокIыл Ахьмэдрэ Iэпыч Мухьэмэдрэ ещанэ хъуахэщ.
Мамий Атмир щытекIуащ килограмм 90 зи хьэлъагъхэм я деж, Лазариди Давидрэ Шыд Жамболэтрэ мыбдеж щыещанэщ. Килограмми I00 хъухэм я зэхьэзэхуэм хэтахэм Кастахов Марат япэ увыпIэр яфIихьащ, етIуанэр Дер Айдэмыр иубыдащ, ещанэр – Тау Астемыррэ Молэ Мухьэмэдрэ.
Ди командэр зэхьэзэхуэм хуагъэхьэзыращ Куп Эдуард, Джэданэ Залым, Емкъуж Рустам, Ким Руслан, Дзухэ Беслъэнрэ Залымрэ, Бэгъуэт Мухьэмэд, Махуэ Олег, Шаваев Хьэнэфий сымэ. 
АЛБЕРДЫКЪУЭ Iэмин.
  • 20 просмотров
Поделиться: