ЦIыхухэр гулъытэ щызымыгъащIэхэр

КъБР-м и Iэтащхьэ КIуэкIуэ Казбек Урысейм и социальнэ лэжьакIуэм и махуэмкIэ ехъуэхъуащ а IэнатIэм пэрытхэм.

«ПщIэ зыхуэсщI ныбжьэгъухэ!
Си гум къыбгъэдэкIыу сынывохъуэхъу Социальнэ лэжьакIуэм и махуэмкIэ, - щытхащ абы и телеграм-каналым. – Фи IэщIагъэр мыхьэнэшхуэ зиIэхэм ящыщщ икIи цIыху куэдым зыкъыфхуагъазэ. Лэжьыгъэм фIыуэ зэрыхэфщIыкIым, фхэлъ жэуаплыныгъэм, IэнатIэм гурэ псэкIэ фызэрыбгъэдэтым елъытащ цIыхухэм я псэукIэм и фIагъыр.
ЦIыху куэдым я къарур я фIэщ мэхъуж, жыджэру псэуну, жылагъуэм щыщ Iыхьэу зэрыщытыр зыхащIэну Iэмал ягъуэт фи фIыгъэкIэ. Фэ фи нэIэ ятетщ унагъуэшхуэхэм, хуэмыщIауэ псэу бынунэхэм, сабий зеиншэхэм, зи узыншагъэкIэ сэкъат зиIэхэм, щытыкIэ гугъу ихуахэм.
Щхьэхуэу къыхэзгъэщыну сыхуейщ дзэ Iуэху хэхам хэтхэм, ветеранхэм, абыхэм я унагъуэхэм щыщхэм сыт и лъэныкъуэкIи защIэгъэкъуэным хуэгъэза лэжьыгъэшхуэ зэревгъэкIуэкIыр.
Си гум къыбгъэдэкIыу фIыщIэ фхузощI фи къару фемыблэжу фызэрылажьэм, къыхэфха IэщIагъэм фызэрыхуэпэжым, цIыхухэр гулъытэ зэрыщывмыгъащIэм, фи гуапагъэм папщIэ.
Шэч къытесхьэркъым социальнэ Iуэхутхьэбзэхэм я фIагъыр къызэрыфIэтынум, цIыху нэхъыбэ абыхэм къызэрызэщIевгъэубыдэнум, захуагъэм, гуапагъэм я хабзэхэр жылагъуэм щызэтеувэным щIэгъэкъуэн фызэрыхуэхъунум.
Узыншагъэ быдэ, ехъулIэныгъэ фиIэну, фи мурадхэр къывэхъулIэну си гуапэщ».