Гулъытэ гуапэ

КъБР-м Лэжьыгъэмрэ социальнэ дэIэпыкъуныгъэмкIэ и министерствэм, ныкъуэдыкъуэхэм защIэзыгъакъуэ «Надежда» Къэ­бэрдей-Балъкъэр жылагъуэ IуэхущIапIэр и гъусэу мэкъуауэгъуэм и 9-м ирагъэкIуэкIащ я узыншагъэмкIэ сэкъат зиIэ ныбжьыщIэ­хэм я зэхыхьэ.

Сабийхэм я узыншагъэр щрагъэфIакIуэ «Лэгъупыкъу» IуэхущIапIэм къыщызэрагъэпэща зэIущIэм кърашэлIат Кавказ Ищхъэрэм и щIыналъэхэм (Дагъыстэн, Ингуш, Шэшэн, Къэрэшей-Шэрджэс, Осетие Ищхъэрэ - Алание республикэхэм, Ставрополь крайм) щыщ­хэр. Дэтхэнэ республикэми къыбгъэдэкIыу цIыху 15 абы къагъэкIуащ (сабийхэм я адэ-анэхэр я щIыгъуу). НыбжьыщIэхэм езыми пшыхь гукъи­нэж ягъэхьэзырат. 
Зэхыхьэм хэтащ КъБР-м Лэжьыгъэмрэ социальнэ дэIэпыкъуныгъэмкIэ и министр Тогузаев ТIэхьир, КъБР-м Сабийм и хуитыныгъэхэр хъумэнымкIэ и уполномоченнэ Бэдракъ Iэми­нэ, къэрал IуэхущIапIэхэмрэ жылагъуэ зэгу­хьэныгъэхэмрэ я лIыкIуэхэр.
КъызэгъэпэщакIуэхэм къызэрыхагъэщамкIэ, зэхыхьэр егъэкIуэкIынымкIэ щIэгъэкъуэ­нышхуэ къахуэхъуащ КъБР-м ЩIалэгъуалэм я IуэхухэмкIэ и министерствэм и ЩIалэгъуалэ центрым и волонтёрхэмрэ «Новые люди» партым и Къэбэрдей-Балъкъэр щIыналъэ къу­дамэм и лIыкIуэхэмрэ. 
Зэхыхьэм хэта псоми КъБР-м Лэжьыгъэмрэ социальнэ дэIэпыкъуныгъэмкIэ и министерствэм и ФIыщIэ тхылърэ саугъэтхэмрэ иратащ. Шэч хэлъкъым, зэхуашэса сабийхэм я нэгу зэрызрагъэужьам, абдеж ныбжьэгъущIэхэр къызэрыщагъуэтам.