Медалихым щыщу плIыр дыщэу

Ингушым и Назрань къалэм дэт «Назрань» спорт комплексым иджыблагъэ щекIуэкIащ Кавказ Ищхъэрэм и щIыналъэхэм зауэ Iэпщэрыбанэ спортымкIэ, зэзауэ зыхэт спорт лIэужьыгъуэхэмкIэ, самбэмкIэ я япэ фестиваль. Къэбэрдей-Балъкъэрым щыщу абы щыIащ Налшык къалэм и «Гладиатор» спорт клубым и гъэсэнхэр. 
Ди республикэм и спортсменхэм ящыщу я хьэлъагъ елъытауэ зыхэта гупхэм япэ увыпIэхэр къыщахьащ Ету Умар, Къанымгъуэт Къантемыр, Сурмаметов Ашэмэз, Ашэбокъуэ Темырлан сымэ. Тембот Сэлим етIуанэ, Мэшокъуэ Сэлим ещанэ хъуахэщ.
ЩIалэхэр зэхьэзэхуэм хуигъэхьэзыращ БищIо Мухьэмэд. 

Япэ утыкур хуэугъурлащ
«Octagon selection 53» фIэщыгъэр зэрихьэу зэзауэ зыхэт спорт лIэужьыгъуэхэмкIэ Къэзахъстаным и Алматы къалэм щекIуэкIа дунейпсо зэхьэзэхуэм къыщыхэжаныкIащ Къэбэрдей-Балъкъэрым и лIыкIуэ Къумахуэ Тимур. 
Мыпхуэдэ утыкушхуэм япэу къихьа адыгэ щIалэм килограмм 57-рэ зи хьэлъагъхэм я деж текIуэныгъэр къыщихьащ - абы къыпэщIэтащ Узбекистаным и зэуакIуэ лъэщ.
Къумахуэр зыгъасэр ПщыукI Залымрэ Къумахуэ Русланрэщ.