Я зэфIэкIхэмкIэ къыдахьэх

Мэзкуу къалэм и ВДНХ-м щекIуэкIа «ЗыплъыхьакIуэ къэкIухь» туризмэм теухуа дунейпсо зэхуэсым Къэбэрдей-Балъкъэрми и зэфIэкIхэр щигъэлъэгъуащ, ядэлэжьэну зэгурыIуэныгъэхэр нэгъуэщI щIыналъэхэм ярищIылIащ, ди стендым къекIуэлIа хьэщIэхэр щыгъуазэ ящIащ ди республикэм а IэнатIэм щиIэ ефIэкIыныгъэхэм. Ди республикэм и лIыкIуэхэм я пашэу щытащ КъБР-м курортхэмрэ туризмэмкIэ и министр Быф Аскэр.

Къэбэрдей-Балъкъэрым нэхъыбэу зытригъэщIар щIыналъэм и турист кIуапIэхэр хэIущIыIу щIынырт, псом хуэмыдэу цIыху нэхъыбэ дызэрыт гъэмахуэм къыдахьэхыфын папщIэ.

«Зэхуэсыр Iуэхугъуэ щхьэпэхэмкIэ гъэнщIауэ икIи купщIафIэу щытащ. Кавказ Ищхъэрэм и щIыналъэхэм я лIыкIуэхэр ди гупсысэхэмкIэ, Iуэху еплъыкIэхэмкIэ дызэхъуэжащ. Кърым Республикэм зэгурыIуэныгъэ етщIылIащ, «Discover Russia» пэхуэщIэм дызэрыхэтынум теухуа зэгурыIуэныгъэми Iэ щIэддзащ.     

Япэ дэфтэрым къызэрыщыгъэлъэгъуамкIэ, мурад щыIэщ Кърымымрэ дэрэ ди турист, санаторэ, курорт IэнатIэхэм жыджэру дыщызэдэлэжьэну, зэпыщIэныгъэхэр едгъэфIэкIуэну. ЕтIуанэ зэгурыIуэныгъэм дунейпсо туризм утыкум дихьэну Iэмал къыдитынущ», - къыхигъэщащ Быф Аскэр.

Зэхыхьэм и лэжьыгъэм къыщаIэта Iуэхугъуэхэм щытепсэлъыхьащ къэралым и ВВП-м туризм IэнатIэм хуищI хэлъхьэныгъэр зыхуэдэм, худэчых зыхэт кредит программэхэм, инфраструктурэм зегъэужьынымрэ турист лъагъуэщIэхэр къызэIухынымрэ. Апхуэдэуи хэплъащ туризмэр бжыгъэр зи лъабжьэ лэжьэкIэм хуэгъэкIуа хъуным, автомобиль, къуажэ, Iуэхугъуэ щхьэхуэхэм, махуэ хэха гуэрхэм епхауэ туризмэм зегъэужьыным. МахуищкIэ екIуэкIа зэхуэсым къыщаIэта Iуэхухэм ятеухуауэ цIыху 400-м щIигъу къэпсэлъащ.

Апхуэдэуи абы щекIуэкIа урысейпсо зэIущIэм щытепсэлъыхьащ туризм IэнатIэм зегъэужьыным ехьэлIауэ лажьэ «Туризмэмрэ индустриемрэ» лъэпкъ пэхуэщIэм кърикIуахэм.

«Зыуэ щыт субсидиер тынымкIэ екIуэкIа къызэрыхах зэхьэзэхуэм ди щIыналъэм ехъулIэныгъэхэр щиIэщ. УФ-м Экономикэ зыужьыныгъэмкIэ и министерствэм и лэжьакIуэхэм къыдгурагъэIуащ ди IэнатIэм ехьэлIауэ кIэлъыплъыныгъэ-къэпщытэныгъэ лэжьыгъэхэр зэредгъэкIуэкIынумрэ республикэм и рейтингыр зэрызэхэдгъэувэну щIыкIэмрэ. Шэч къытесхьэркъым, дызыхэта зэIущIэм и Iэужьу фIы куэд мы илъэсым зэрытлъагъунум, ди деж къакIуэ туристхэм я бжыгъэм зэрыхэхъуэнум, пэхуэщIэщIэхэр нэсу зэрылэжьэнум», - къыхигъэщащ министрым.

Лэжьыгъэ зэIущIэхэм къадэкIуэу, Къэбэрдей-Балъкъэрым и стендым деж махуэкIэ къыщызэхуэса хьэщIэхэм хабзэ щыкIэлъызэрахьащ, лъэпкъ макъамэхэмрэ уэрэдхэмкIэ ахэр кърагъэблэгъащ, мастер-классхэр щрагъэкIуэкIащ, зэхьэзэхуэ гъэщIэгъуэнхэр щызэхашащ, сабий джэгупIэхэр къыщызэрагъэпэщащ, ерыскъы хэплъыхьахэмрэ гуакIуэхэмрэ Iуагъэхуащ.