ЗэрыгуфIэр хуэмыгъэпщкIуу

ГъэщIэгъуэнщ

Уахэм ди планетэм и хъуреягъкIэ къыщызылъэтыхь Къэрал зэхуаку станцым (МКС) и Iэхэлъахэм къыщыщIидзащ США-м щыIэ SpaceX компанием NASA щIэныгъэ IуэхущIапIэм хуигъэхьэзыра Crew Dragon хьэршырыкIуэ кхъухьлъатэр. Абы къыкIэраутIыпщыкIа Falcon 9 ракетэм исащ а къэралым щыщ астронавт щIалэхэу Бенкен Робертрэ Херли Дагласрэ. 
ЖыжьэрыкIуэ кхъуафэр, щIым зыкъытриIэтыкIа иужькIэ, сыхьэт 24-м и кIуэцIкIэ МКС-м къыбгъэдэхутащ. А Iуэхум теухуа хъыбар зэбграгъэхащ NASA IуэхущIапIэм и лэжьакIуэхэм. Къыхэгъэщыпхъэщ, иужьрей илъэсипщIым къриубыдэу, цIыху зэрыс хьэршырыкIуэ кхъухьлъатэхэм ящыщ гуэрми США-м и щIыналъэм зэрызыщимыIэтари.
2011 гъэм и бадзэуэгъуэм къыщыщIэдзауэ иужьрей илъэсхэм къэсыху, США-м и астронавтхэр МКС-м езышалIэу къэгъуэгурыкIуар Урысей Федерацэм и «Союз» ракетэхэрщ (а къалэныр езыхэм я «Шаттл» кхъухьлъатэхэм яхуэмыгъэзэщIэж щыхъуам). АрщхьэкIэ, НАСА-м и унафэщIхэм, апхуэдэу къызэрекIуэкIыр яфIэмыфIу, зыхуагъэзат хьэршыр бэIутIэIуншэу зэпызыупщIыф кхъуафэщIэхэр зыухуэфыну къалъыта SpaceX, Boeing хьэрычэтыщIэ компаниехэм. 
А тIум ящыщу зи IэдакъэщIэкIыр нэхъ хуэщIауэ къыщIэкIар SpaceX IуэхущIапIэм игъэхьэзырар арати, НАСА-м ар къыхихащ, и пщэ дилъхьэжа къалэныр нэхъ ирихуэгъэзэщIэну къибжати.
Crew Dragon капсулэм (зэрышынагъуэншэр зрагъэщIэн мурадкIэ) хьэнцэгуащэ ирагъэтIысхьэри, ди планетэм километр 400-кIэ пэIэщIэ МКС-м яутIыпщащ. ХутакIуэ-хьэршырыкIуэр абы нэсри, махуи 6 дэкIа иужькIэ къигъэзэжащ, цIыху теплъэ зиIэу и гъусари зэрыщытауэ ЩIым къигъэсыжащ. 
«NASA IуэхущIапIэм и закъуэ къарукIэ уахэм иутIыпщ ди астронавтхэр къызытелъэтыкIри дищIщ, зэрысри ди ракетэщ!» - щыжеIэ Твиттерым щиIэ и напэкIуэцIым, зэрыгуфIэр хуэмыгъэпщкIуу, США-м Аэронавтикэм, хьэрш гъунэгъур джынымкIэ и лъэпкъ IуэхущIапIэм (NASA-м) и унафэщI Брайденстайн Джим.
Crew Dragon хьэршырыкIуэ кхъухьлъатэр Кеннеди и цIэр зезыхьэу Флоридэ штатым ит центрым телъэтыкIащ.