Акъбащ Ипщэм и «Лидер» ансамблым и тхыдэ дахэр 1992 гъэм къыщожьэ.
КIэнцIэлий ТIимошэ куэд щIауэ и хъуэпсапIэт ансамбль къызэригъэпэщыну. Дзэм къулыкъу щищIэу къигъэзэжа нэужь, абы и къуажэгъухэм жаIэу зэхихат Германием щащIа пшынэ зы щIалэм зэриIэр. Ар Уэрэзей Тимурт. Иджыри я зы ныбжьэгъу – Къандрокъуэ Альберт арэзы хъуащ ансамблым къыхыхьэну.
КIэнцIэлийм зэрыжиIэмкIэ, езыхэм ятхыжа уэрэдхэрт ягъэзэщIэну я мурадыр. Хьэзыру уэрэд зытIущ яIэт, ауэ макъамэ IэмэпсымэхэмкIэ къызэгъэпэщатэкъым. Апхуэдэу щыхъум, макъамэ IэмэпсымэхэмкIэ ансамблым зыгуадзэри, клубым концерт щатащ, уэрэдищ щагъэзэщIащ. Я уэрэдхэр ягу дыхьауэ Iэгуауэшхуэ хуаIэтат абыхэм. Апхуэдэу къацIыхури, 90 гъэхэм цIыхушхуэ зэхуашэс хъуащ. Зэманыр гугъуу щытами, зыхуеину Iэмэпсымэхэр къащэхури, районым, языныкъуэхэм деж Налшык къалэм, зыкъыщагъэлъагъуэ хъуащ.
1992 гъэм Налшык и Театр ЩхъуантIэм щекIуэкIа «Серебряные струны» зэпеуэм «Лидер» ансамблыр ирагъэблэгъащ икIи абы и лауреат хъуащ. 1994 гъэми зыIэрагъэхьэжыфащ а ехъулIэныгъэр.
1993 гъэм гупым хыхьащ ГъуазджэхэмкIэ Кавказ Ищхъэрэ къэрал институтым Щэнхабзэмрэ гъуазджэмкIэ и колледжым и унафэщI, профессор Шэрыб Валерэ. Ансамблыр зэфIэувэным абы хэлъхьэныгъэ ин хуищIащ. Гупым хэтхэм макъамэ щIэныгъэ зэрамыIэм къыхэкIыу, Шэрыбым и чэнджэщхэр куэду яхуэщхьэпащ. Республикэм щекIуэкI зэпеуэхэм ансамблыр и зэфIэкI щеплъыжырт икIи япэ увыпIэхэр къыщихьырт. Ауэ 1996 гъэм ансамблыр зэбгрыкIыжащ. ЩIэрыщIэу къэунэхужащ 2009 гъэм. Я уэрэдхэр къагъэщIэрэщIэжри утыку кърахьэжащ. Тэрч къалэм щекIуэкI «Ностальгия» фестивалым иджы зэпымыууэ хэтщ «Лидер» гупыр. Нэхъапэхэми хуэдэу, езыхэм адыгэбзэрэ урысыбзэкIэ ятхыжа уэрэдхэрщ ягъэзащIэр, «Анэ», «Белый снег», «Может зря», «Дождик» жыпIэми. Ансамблым и концертхэм екIуалIэхэм ахэр дзапэ уэрэд яхуэхъуащ. Гупым я лэжьэкIэм дихьэххэм я лъэIукIэ, 80 гъэхэм щIэупщIэшхуэ яIэу ягъэзащIэу щыта уэрэдхэр жаIэ.
Акъбащ Ипщэм ЩэнхабзэмкIэ и унэр зэрагъэпэщыжу къызэIуахыжа нэужь, абы и унафэщI ХьэтIэф Анжелэ, ансамблыр щIалэгъуалэм фIыуэ зэралъагъур щызэхихым, щIэх-щIэхыурэ иригъэблагъэ хъуащ. Гупым егъэдахэ Тэрч щIыналъэм къыщызэрагъэпэщ зэхыхьэхэмрэ концертхэмрэ. ВИА «Лидер» гупым хэтхэм (КIэнцIэлий ТIимошэ, Уэрэзей Тимур, Къандрокъуэ Альберт, Марыш СулътIан, Къэбэрдокъуэ Руслан) гуапэ ящохъу я пшыхьхэм тIысыпIэ нэщI имыIэжу цIыхухэр зэрыщызэхуэсыр.
