Тхылъ тедзапIэм и унафэщIхэу, лъахэхутэ-къэхутакIуэхэу Котляровхэ Викторрэ Мариерэ Москва щекIуэкIа «Красная площадь» тхылъ фестивалым иджыблагъэ къыщыхуагъэфэщащ «Хрустальный компас» лъэпкъ саугъэтыр. Зэхыхьэм зэхуишэсат къэралым и щIыналъэ 50-м щIигъум щыIэ тхылъ тедзапIэ 400-м нэблагъэ. Абы щагъэлъэгъуащ тхылъ мини 100-м щIигъу.
Котляров Виктор зэрыжиIэмкIэ, езымрэ Мариерэ я лэжьыгъэхэм лъабжьэ яхуэхъур щыпсэу щIыналъэмрэ абы и цIыхухэмрэщ.
- Тхылъхэр къыдэдгъэкI, тщэ къудей мыхъуу, ди къалэн нэхъыщхьэу къыдолъытэ лъэпкъ Iущыгъэр, хъугъуэфIыгъуэр тхъумэныр, зэфIэкI зиIэ цIыхухэм я цIэ дгъэIуныр. Ди лэжьыгъэхэм ящыщхэм, псалъэм папщIэ, «Илъэсым и тхылъ» саугъэтыр къыщыхуагъэфащэкIэ ар щыхьэт техъуэрт зи яужь дит Iуэхур нэгъуэщIхэм гъэщIэгъуэн зэращыхъум, - жеIэ Виктор.
Къэралым иджыблагъэ щекIуэкIа «Красная площадь» тхылъ фестиваль нэхъыщхьэм и къэпщытакIуэ гупым хэтхэм Котляровхэ къыхуагъэфэщащ дамыгъих. «Лучшие книги года» зэпеуэм и лауреат хъуащ Викторрэ Мариерэ, Урысейм и тхылъ тедзапIэ нэхъыфIхэм я IуэхущIапIэр ящыщу къалъытэри.
Лэжьыгъэ нэхъыфIу къыхагъэщащ Кулиев Къайсын и тхыгъэми, езым теухуами том 12 хъууэ (урысыбзэрэ балъкъэрыбзэкIэ тхыгъэхэр щызэхуэхьэсауэ) къыдагъэкIа тхылъхэр. Сабийхэм яхуэгъэзауэ абы дыщIагъужащ справочнэ лэжьыгъэрэ усэхэмрэ зэрыхуа томитI.
КъинэмыщIауэ, «Край, отмеченный десницей Бога. Кабардино-Балкария. Зольская земля» сурэтылъэ альбомыр зэпеуэм и «Лучшая книга о российских регионах» унэтIыныгъэм щытекIуащ. Лъэпкъ географиемкIэ, щIыуэпсыр хъумэнымкIэ, Урысейм и щIыуэпс, тхыдэ-щэнхабзэ хъугъуэфIыгъуэхэр хъумэнымрэ ахэр хэIущIыIу щIынымкIэ «Хрустальный компас» япэ саугъэтыр къызэзыгъэпэщахэм «Возьмём тебя с собой… По достопримечательным местам Кабардино-Балкарии» лэжьыгъэм «Хрустальный компас» лъэпкъ саугъэтыр иратащ. Ар зыхуагъэфащэ хабзэр щIыуэпсыр, тхыдэ-щэнхабзэ хъугъуэфIыгъуэхэр хъумэным хэлъхьэныгъэ ин хуэзыщIхэрщ. Котляровхэ Викторрэ Мариерэ я цIэкIэ фестивалым хэта япхъу Аннэ къратащ щIыхь тхылърэ Урысейм япэу тхылъ щытезыдза Фёдоров Иван и теплъэм къытращIыкIа домбеякъ статуэткэмрэ.
Иджыри ехъулIэныгъэщIэ. «Книга года на родине П. И. Чайковского» фестиваль-зэпеуэм Котляровхэ Викторрэ Мариерэ «Лучшее краеведческое издание» унэтIыныгъэм и щIыхь тхылъым и япэ нагъыщэр къыщихьащ. Уфа къалэм щекIуэкIа «Китап Байрам» ещанэ тхылъ жармыкIэ-фестивалым «Время героев» унэтIыныгъэм щIыхь тхылъхэр къыщыхуагъэфэщащ, «Мы вернёмся, мы будем рядом…» томищым папщIэ. Абы хагъэхьащ Урысейм и лIыхъужьхэу дзэ Iуэху хэхам къулыкъу щызыщIэхэм я IэдакъэщIэкI усэхэр. «Лучшее научное, научно-популярное издание» унэтIыныгъэм нэхъыфIу къыщалъытащ Залиханов М. Ч. и «Эльбрус: история, религия и политика» къыдэкIыгъуэр.
Котляровхэ Викторрэ Мариерэ я тхылъ тедзапIэр къызэрызэрагъэпэщрэ мы гъэм илъэс 25-рэ ирокъу. А пIалъэм къриубыдэу Кавказ Ищхъэрэм, Къэбэрдей-Балъкъэрым теухуа тхылъ минищым щIигъу къыдагъэкIащ, сыт и лъэныкъуэкIи зыхуей хуэгъэзауэ.
Котляровхэ Викторрэ Мариерэ иджыблагъэ, Урысейм и махуэм ирихьэлIэу, хуэфащэ дыдэу къратащ «За заслуги перед Кабардино-Балкарией» орденыр.
