Азрэт Хэкум и къыщхьэщыжакIуэщ

Дэтхэнэ цIыхуми хэлъ хьэл-щэнхэм я нэхъыщхьэхэр наIуэ къохъу ар щытыкIэ къызэ­ры­мыкIуэм щихуэм деж. Зи гугъу сщIы а щытыкIэр къэзышэ щхьэу­сыгъуэхэм хохьэ уи щхьэкIэ е уи IыхьлыкIэ гузэвэгъуэ ущыхэхуэр, фIэкIыпIэрэ хэкIыпIэрэ зыхуумыгъуэт Iуэхугъуэхэр къыщыкъуэкIыр. Псом хуэдэжкъым, дауи, укъыщалъхуа щIыналъэм, ущыпсэу къэралым шынагъуэ къыщыщ­хьэ­­щыхьэр. Хэкупсэ гъэсэныгъэ зыхэлъ цIыхум абы щыгъуэ къызыкъуих къарумрэ лIэ­кIы­ныгъэмрэ, лIыгъэмрэ хахуа­гъэмрэ зыхуэбгъэдэн щымыIэми ярейщ. Апхуэдэ щапхъэхэр гъунэжу щыдолъагъу, ди къэ­ралым и тхыдэ блэкIам хэта къуэ­хъукъащIэ къызэрымы­кIуэхэм я напэкIуэцIхэм дыщ­рип­­лъэжкIэ. 

Ноби дыщыпсэур апхуэдэ зэманщ: дуней псом къэралу щыIэм я нэхъыбапIэр хэтщ зэпэ­щIэувэныгъэ зэмылIэужьыгъуэ­хэм. Апхуэдэ щытыкIэ ткIийм илъэс еплIанэ мэхъури дитщ дэри. Урысей Федерацэм и Президентым ищIа Унафэм ипкъ иткIэ, гъунэгъу щIыналъэм щокIуэкI дзэ Iуэху хэха. Къэралым хыхьэ щIыналъэ псоми я лIы­кIуэхэр хэтщ а зэпэщIэувэныгъэм. Ди лъахэгъухэри мымащIэу итщ зауэ губгъуэхэм, Хэкум и къыщхьэщыжакIуэ нэс хъуауэ. Зы къали къуажи къэнакъым а зауэм зи щIалэхэр зымыгъэкIуа. Ди унагъуэ куэдым я къуэхэр, щхьэгъусэхэр Iутщ а IэнатIэм, лIыгъэрэ хахуагъэрэ къагъэлъагъуэу. Абыхэм ящыщщ Урысей Федерацэм Зыхъумэ­жыны­гъэмкIэ и министерствэм  и дзэ къудамэхэм ящыщ зым и ­командир Шыкуэ Азрэт Валерэ и къуэр. 
Гушхуэныгъэ ин тхэлъу жыдоIэри, ди щIалэхэр зыхэтым фIыкIэ къахэщхэм ящыщщ: я хьэл-щэнкIи, гупым зэрахэзагъэкIи, IэрыхуагъкIи, жыджэрагъкIи, лIыгъэрэ хахуагъэу къа­къуэкIымкIи. Апхуэдэщ Шыкуэ Азрэти. «Мыщэ» цIэ лейр зиIэу фронтым Iут адыгэ щIалэр ­Налшык къыщалъхуащ. Курыт школыр ехъулIэныгъэкIэ къиух­ри, Къэбэрдей-Балъкъэр къэ­рал университетым щIэныгъэ нэхъыщхьэ щызригъэгъуэтащ. Дзэ къулыкъур ирихьэкIа нэужь, абы адэкIи щыпищащ Урысей Фе­дерацэм ЗыхъумэжыныгъэмкIэ  и министерствэм и дзэ къудамэхэм ящыщ зым. СВО-р зэ­раублэ лъандэрэ Шыкуэр хэтщ а зэпэщIэувэныгъэм, лIыгъэрэ хахуагъэрэ къигъэлъагъуэу. Азрэт бийм пэщIэтщ, зи цIэджэгъу псэущхьэ Iэлым хэлъ лъэкIыныгъэшхуэм нэхърэ нэхъыбэж зэ­фIэкI къызыкъуихыу. Ди щIалэхэм зэрахабзэщи, ари щыс­хьырабгъу лъэпкъ хэмылъу, ­ерыщу икIи къикIуэт имыщIэу, щхьэ­­мыгъазэу зауэ IэнатIэм Iутщ, захуагъэм, зэпIэзэрыты­ныгъэм, мамырыгъэм папщIэ. 
Хэкум и пащхьэм щиIэ къа­лэнхэр пэжу, къикIуэт имыщIэу зыгъэзащIэ адыгэ щIалэ лIы­хъужьым бгъэдэлъ гупсысэ куумрэ акъылыфIагъымрэ наIуэ дыдэ къэхъуащ, ар зи пашэ дзэ гупыр Луганск, Донецк цIыхубэ республикэхэм, Курск областым я щIыналъэхэр, абыхэм щыпсэухэр хуит къэщIыжыным хуэгъэпса дзэ Iуэхухэр щрагъэкIуэкIым. Пщэ­рылъ къыщащI къалэнхэр къызыхуэтыншэу зэрызэфIихым къыдэкIуэу, Шыкуэм езым зэхигъэувэж план хэхам тету мызэ-мытIэу къызэригъэпэщащ икIи иригъэкIуэкIащ ехъулIэныгъэфI­хэр къызыпэкIуа ебгъэры­кIуэ­ны­гъэхэр.
Адыгэ щIалэм бгъэдэлъ ап­хуэдэ зэфIэкI лъагэхэр гулъы­тэншэ хъуакъым. Шыкуэм къы­хуа­гъэфэщащ къэралым, дзэ IэнатIэхэм я дамыгъэ лъапIэхэр, дзэпщхэм къабгъэдэкI фIыщIэ тхылъхэр. Азрэт и бгъэгум щылыд дамыгъэхэм ящыщщ Луганск ЦIыхубэ Республикэр хуит къэщIыжыным епха дзэ Iуэхухэм лIыгъэшхуэ къигъэлъагъуэу зэ­ры­хэтым къыпэкIуэу, а щIыналъэм и Iэтащхьэм ищIа унафэм ипкъ иткIэ кърата  «Хахуагъэм ­папщIэ» медалыр. А дамыгъэ л­ъапIэхэм ящыщ дэтхэнэри Шыкуэ Азрэт къилэжьащ къигъэ­лъэгъуа хахуа­гъэмкIэ, хэлъ быдагъэмрэ зэ­пIэзэрытыгъэмкIэ. 
Къэбэрдей-Балъкъэрым щыщ щIалэхэр къэрал щхьэхуитыныгъэм къэмылэнджэжу зэры­щIэ­зэум и щыхьэтхэм ящыщ зыщ Шыкуэм и зауэ гъуэгуанэр. Ап­хуэдэ щапхъэхэр, шэч хэмылъу, сэбэпышхуэщ щIыналъэм къи­хъуэ щIэблэр хэкупсэ нэсу, къэралым и къыщхьэщыжакIуэ лъэщу гъэсэнымкIэ. Къытщ­хьэщытым долъэIу адыгэхэм         ди лъэпкъыцIэр фIыкIэ зыгъэIу Шыкуэ Азрэт, апхуэдэуи зауэ   IэнатIэ гугъур щIыхь пылъу мы зэманым езыхьэкI адрей ди   щIалэхэри узын­шэу, Iэпсо-лъэпсоуэ икIэ­щIыпIэкIэ я унагъуэхэм ихьэжыну, ТекIуэныгъэр къа­хьауэ. Шэч хэлъкъым: абы­хэм я гъащIэр, зэрахьэ лIыгъэмрэ къа­къуэкI ­хахуагъэмрэ быдагъэмрэ бэм я гъуэгугъэ-лъа­гъуэу, я щапхъэу куэдрэ щытынущ. Апхуэдэ пщIэ ягъуэт хабзэщ къэралым и щхьэхуитыныгъэр зыхъумэхэм. 

ЖЫЛАСЭ  Маритэ.