Макъамэ Iэмэпсымэхэм я пшыхь

Бахъсэн къалэм ЩэнхабзэмкIэ и унэм «Пшыналъэ» зи фIэщыгъэр иIэу щекIуэкIащ адыгэ цIыхубэ макъамэ Iэмэпсымэхэм еуэхэм папщIэ къызэрагъэпэща пшыхь гукъинэжыр. 

Адыгэм, Кавказым щыпсэухэм я гъащIэм къыгуэхыпIэ имыIэу хэтщ макъамэ Iэмэпсымэхэр. Къапщтэмэ, пшынэр Iэмэпсымэ къудейкъым, атIэ ар щэнхабзэ, лъэпкъ дамыгъэ хъуащ. Пшынэр псэм йохуэбылIэ, абы фIым, дахагъэм укъыхуреджэ. 
Концертым хагъэхьащ адыгэ композитор цIэрыIуэхэм я IэдакъэщIэкI макъамэхэр. Ахэр ягъэзэщIащ ЩэнхабзэмкIэ унэм и лэжьакIуэ Къуэдз Залымрэ пшыхьым хэта артистхэмрэ (ТеуныкI А., ЛIыбекъуэ С., Дзу А., Бахъсэн А., Къуэдз Н.). Пшыхьыр ягъэдэхащ «Кавказ микс» ансамблым и пшынауэхэм. Гупым и художественнэ унафэщIыр Теувэжыкъуэ Русланщ. 
 Пшыхьым ирагъэблэгъащ дзэ Iуэху хэхам хэта офицер Щоджэн Ахьмэд и унагъуэр. 
Фигу къэдгъэкIыжынщи, ЩэнхабзэмкIэ унэр 2022 гъэм зэрагъэпэщыжри къызэIуахыжащ, «Щэнхабзэ» лъэпкъ Iуэхум хыхьэу.