И гуапагъэм узыIэпешэ

«Вындыжь Мариерэ сэрэ дызэрызэрыцIыхурэ илъэс 30-м нэблэгъащ. А зэманым къриубыдэу дэ тIур куэдрэ дызэхуэзащ лэжьыгъэ IуэхукIэ. Гу зылъыстаращи, зы хьэлымрэ зы щэнымрэ ит адыгэ бзылъхугъэр и псэкIэ къабзэщ, и гупсысэкIэ куущ, и Iуэху зехьэкIэкIэ щапхъэщ. Абы къыпкърыкI гуапагъэм узыIэпешэ, удехьэх», - апхуэдэу жеIэ усакIуэ цIэрыIуэ Зэгъэщтокъуэ Людмилэ.

УсакIуэ зэчиифIэр къызэрыщыхъур къригъэлъагъуэу Зэгъэщтокъуэм  Марие  хуитхауэ щытам хэтщ «сабиипсэр зыхэзыщIэ, сабиибзэр зыIурылъ» жыхуиIэ псалъэхэр.  ИпэжыпIэкIэ, Вындыжьым и усэхэр зи лъабжьэ уэрэдылъэр щэнхабзэм и лэжьакIуэ куэдым къагъэсэбэп.

«Сэри Къэсейхьэблэ къуажэм абыкIэ сабийхэм  сфIэфIу сащыдолажьэ. Сыт хуэдэ лъэхъэни школакIуэ цIыкIухэм я дзапэ уэрэдхэм ящыщщ  Марие и псалъэхэр зыщIэлъ  «Си егъэджакIуэ», «Удз гъэгъа», «Школ вальс» уэрэд дахэхэр, - пещэ Людмилэ и псалъэм. - Апхуэдэу жылэ зыбжанэм  куэдрэ къыщызэрагъэпэщащ Вындыжь Мариерэ сабийхэмрэ я пшыхьхэр. А зэхуэзэхэр икъукIэ щхьэпэщ лъэныкъуитIым я дежкIи: усакIуэм и къалэмыпэм щIэуэ къыщIэкIахэм цIыкIухэр щыгъуазэ мэхъу, Марии абыхэм я гупсысэхэмрэ Iуэху еплъыкIэщIэхэмрэ къещIэ. Марие «Iэхэр» зыфIища усэр куэдым гунэс ящыхъухэм ящыщщ:    «Сыту щабэ анэм и Iэр,  Сыту IэфI-тIэ адэм и Iэр,  Щызэдэпшхым деж унагъуэм,  Къилэжьа и гуащIэдэкI. Сыту хуабэ пщащэм и Iэр, Щауэм и Iэм ар IэщIэлъым - ТIуми я гур къегъэплъыф. Сыту щIыIэ жагъуэгъуIэр, КъищIыфынумэ уи жагъуэ, Къигъэнэнкъым хузэфIэкI…     Сыту къабзэ сабийм и Iэр, КъешэкIауэ пщэм пщIэхэлъым Дунейр къабзэ къыпщещIыф… Сыту лъэщ-тIэ цIыхум и Iэр - КъыпхуищIэнур сыту щытми, Ар зыпытым елъытащ».

Людмилэ зэрыжиIэмкIэ, дэни нос Марие и псалъэр. Журналист Вындыжьым репортаж гъэщIэгъуэнхэр къыздримытыкIа щIыпIэ ди республикэм къыщымынами ярейщ, абыхэм къызэщIаубыдащ школхэм,  сабий садхэм, егъэджакIуэхэм, гъэсакIуэхэм, еджакIуэхэм я зэпеуэ, зыкъэгъэлъэгъуэныгъэ, зэхыхьэ зэмылIэужьыгъуэхэр.  Езыр мылэжьэжми, ахэр щахъумэ радиом и фондым икIи щIэх-щIэхыурэ къат. Апхуэдэуи, ди щIыналъэм анэдэлъхубзэр щезыгъэджхэр, сабий садхэм я гъэсакIуэ IэкIуэлъакIуэхэр радиом и  студием иригъэблагъэурэ,  Марие цIыхубэм я деж нихьэсащ абыхэм я Iуэху зехьэкIэ пэрытхэр,  дуней еплъыкIэхэр, егъэджэныгъэ-гъэсэныгъэм щекIуэкI икIи къыхыхьэ зэхъуэкIыныгъэфIхэр.

Сабийм и бзэр дихьэхыу егъэджыным, лъэпкъым бгъэдэлъ псэкупсэ къулеягъым ар  ешэлIэным, и хабзэр, тхыдэр фIэгъэщIэгъуэну зригъэщIэным хуэшэным хьэлэлу хуэлажьэ хэкупсэхэм ящыщ Вындыжьым лэжьыгъэ щхьэпэ куэд зэфIихащ а унэтIыныгъэмкIэ. Бзылъхугъэ щыпкъэм, зи хэкур,  къыщалъхуа щIыналъэр, и лъэпкъэгъухэр фIыуэ зылъагъу, зи бзэр IэфIу зигу илъ цIыхум  мураду иIэр къехъулIэу, узыншагъэкIэ, унагъуэкIэ дяпэкIэ  гукъеуэ имыIэу Тхьэм куэдрэ игъэпсэу.

КЪАРДЭН Ритэ.