Лэжьыгъэм зэпыу иIэкъым

УФ-м и Правительствэм и УнафэщIым и къуэ­дзэ Хуснуллин Марат видеоконференц IэмалкIэ шыщхьэуIум и 7-м иригъэ­кIуэкIа, ЩIыналъэхэм зегъэужьынымкIэ комиссэм и зэIущIэм хэтащ КъБР-м и Iэтащхьэ КIуэкIуэ Казбек.

Бжьыхьэ - щIымахуэ лъэхъэнэм зыхуэгъэ­хьэ­зырын зэрыхуейм­рэ къэрал, лъэпкъ проектхэр щIы­налъэхэм зэрыщагъэзащIэ щIыкIэмрэщ къы­зэхуэсахэр нэхъыбэу зытепсэлъыхьар. 
Къэбэрдей-Балъкъэрым гъэплъыгъуэм хуэгъэ­хьэзырын ­хуейуэ фэтэр куэду зэхэт унэ ­2911-рэ, ­котельнэ 372-рэ итщ, абыхэм хеубыдэ псырэ ­хуабэрэ щызекIуэ бжьамийхэмрэ нэгъуэщI Iэ­мэпсымэхэмрэ. 
ЩэкIуэгъуэм ирихьэлIэу зэрагъэпэщынущ ­гъуэгухэр щтырыгъум щыхъума хъун папщIэ ­къагъэщхьэпэ пшахъуэ, шыгъу, Iуэхум хуэщIа Iэмэпсымэхэр. 
УФ-м и Президент Путин Владимир къыхилъхьа лъэпкъ проект­хэр адрей лэжьыгъэ псоми япэ ­ирагъэщ. «Иджырей школ» къэрал проектым ипкъ иткIэ, мы гъэм курыт еджапIибгъу ятынущ. Уна­гъуэм зыщIэгъэкъуэным и IуэхукIэ, Бахъсэн, Гундэлэн, Старэ Шэрэдж сабий IыгъыпIэхэр ­щаухуэнущ. 
КИФЩI-м зегъэужьыным хуэунэтIа къэрал программэмкIэ Тырныауз зыгъэкъабзэ ухуэныгъэхэр щаухуэ. Лышхым щеIэзэ диспансерым йолэжь, Кэнжэ дэт амбулаторэр мыгувэу къызэIуахынущ. ­Къуажэхэм заужьыным епха проектхэм объекти 10 хэтщ. ­КъинэмыщIауэ, республикэм ит школхэри, сабий IыгъыпIэхэри, спортымрэ щэнхабзэмрэ епхауэ лажьэ унэхэри зэIузэпэщ ящI. 
«ГъащIэм хуэщIа инфраструктурэ» программэмкIэ зэлэжьыну объект 39-м щыщу 11-м я проектхэр хьэзырщ. «Коммунальнэ инфраструктурэр зэгъэпэщыжын» къэрал проектым ипкъ иткIэ, псы зекIуапIэ 22-рэ зыхуей хуагъэзэнущ. Гъуэгу объекту 18 яутIыпщакIэщ, ар псори зэхэту километр 56,7-м нос, лъэмыжхэри абы хеубыдэ.