Дзэ Iуэху хэхам и ветеранхэр зэIуощIэ

Шэджэм щIыналъэм хыхьэ Нартан къуажэм щекIуэкIащ Къэбэрдей-­Балъкъэрым щыщу зауэ зэпэщIэувэныгъэхэмрэ дзэ Iуэху хэхамрэ хэ­кIуэдахэм шахматымкIэ я фэеплъ зэхьэзэхуэ. Абы щызэпеуащ СВО-м и ветеранхэмрэ зи узыншагъэм сэ­къат иIэхэмрэ. Ар къызэрагъэпэщащ ­республикэм и ветеран зэгухьэныгъэхэм я жэрдэмщIакIуэхэм.

Зэпеуэм щытекIуащ ГъукIапщэ Юрэ. ЕтIуанэ, ещанэ увыпIэхэр къахьащ Къалмыкъ Русланрэ Бырсекъуэ Замиррэ. ТекIуахэм иратащ медалхэр, кубокхэр, щIыхь тхылъхэр.
Хэкум и хъумакIуэм и илъэсыр гъэ­лъэпIэным ехьэлIауэ ирагъэкIуэкIа Iуэху­хэр жыджэру зэрыдаIыгъам щхьэ­кIэ Нартан къуажэм ЩэнхабзэмкIэ и унэм и унафэщI КIагуэ Валерэ, художественнэ унафэщI ДыщэкI Мухьэмэд сымэ, нэгъуэщIхэми фIыщIэ тхылъхэр иратащ. 
Фигу къэдгъэкIыжынщи, 2025 гъэм и бадзэуэгъуэм щегъэжьауэ КъБР-м Лъэпкъ Iуэхухэмрэ жылагъуэ пэхуэ­щIэ­хэмкIэ и министерствэм ирата субси­диемкIэ зауэ зэпэщIэувэныгъэхэм ныкъуэдыкъуагъэ хэзыхахэм я «ВоИн» зэгухьэныгъэм «Дыдейхэр утыку къиднэркъым-2.0» социальнэ пэхуэщIэр егъэзащIэ. Ар хуэунэтIащ ветеранхэр ма­мыр псэукIэм къыхэшэжыным, я дэрэжэгъуэмрэ гукъэдэжымрэ нобэрей зэхьэзэхуэхэм хуэдэхэмкIэ, Iуэхугъуэ щхьэпэхэмкIэ къэIэтыным, зауэ зэпэ­щIэувэныгъэхэм хэтахэм я зэгухьэныгъэхэм я лэжьыгъэхэр зэгъэуIуным. 
ПэхуэщIэм и унафэщIхэр КъБР-м и Парламентым и депутат, «ВоИн» щIыналъэ къудамэм и тхьэмадэ Тхьэгъэ­лэдж Тимуррэ КъБР-м и Жылагъуэ палатэм физкультурэмрэ спортымкIэ, узыншагъэр хъумэнымрэ социальнэ политикэмкIэ и комиссэм хэт, щIыпIэ «ВоИн»-м и унафэщIым и къуэдзэ Га­лушкэ Михаилрэщ.