ЩIыхуэр дагъэпсынщIэ

2025 гъэм и япэ мазихым Кавказ Ищхъэрэм хьэрычэт IэнатIэ мащIэмрэ курытымрэ пэрыт и IуэхущIапIэхэм псоми зэхэту банкхэм щIыхуэу къыIахам сом меларди 5,76-м нэблагъэ иджыри къыхагъэхъуащ, ахъшэр къезытахэм я деж абыхэм къыщащта къалэнхэм и Iыхьэ гуэрхэмкIэ МСП Корпорацэр шэсыпIэ яхуиувэу. Нэгъабэ и апхуэдэ пIалъэм щыIа бжыгъэхэм нэхърэ проценти 6-кIэ нэхъыбэщ ар.

«Кавказ Ищхъэрэм и щIыналъэхэм я хьэрычэтыщIэхэм я IэнатIэхэм мылъку къыхрагъэлъхьэн щхьэкIэ къэрал дэIэпыкъуныгъэ Iэмалхэр жыджэру къагъэсэбэп. Дызэрыт илъэсым и щIышылэм – мэкъуауэгъуэм къриубыдэу Лъэпкъ шэсыпIэ системэм хэтхэм ящыщу КИФЩI-м и хьэрычэт IэнатIэ мащIэмрэ курытымрэ сом мелард 22,3-рэ я лэжьыгъэм къыхашэн яхузэфIэкIащ. 2024 гъэм и апхуэдэ пIалъэм щыIа бжыгъэхэм нэхърэ процент 56-кIэ нэхъыбэщ ар.

Къэрал дэIэпыкъуныгъэхэм ящыщу хьэрычэтыщIэхэм нэхъыбэу къагъэсэбэпыр банкхэм я пащхьэм щагъэзэщIэну къащыпэщылъ къалэнхэм и Iыхьэ гуэрхэмкIэ МСП Корпорацэр шэсыпIэ щыувырщ. Сыту жыпIэмэ, ахъшэ къыIахым пэкIуэн мылъку (сакъылэт) къагъэнэн щамыIэм е абы и уасэр щыцIыкIум деж, а Iэмалым ахэр хуэкIуэн хуей мэхъури. Апхуэдэ къыщхьэщыжакIуэ щыщыIэм деж, хьэрычэтыщIэхэм я бизнес пэхуэщIэхэр банкхэми нэхъ даIыгъщ», - жиIащ УФ-м и Правительствэм и УнафэщIым и къуэдзэ Новак Александр.

МСП Корпорацием и шэсыпIэр къагъэсэбэпу ахъшэ нэхъыбэ я IэнатIэхэм къезышэлIа щIыналъэхэм яхохьэ Ставрополь крайр (сом меларди 3,54-рэ), Шэшэныр (сом мелард 0,86-рэ), Осетие Ищхъэрэ – Аланиер (сом мелард 0,54-рэ), Къэбэрдей-Балъкъэрыр (сом мелард 0,43-рэ), Дагъыстэныр (сом мелард 0,26-рэ). Апхуэдэ IэмалкIэ я IэнатIэхэм къыхаша ахъшэм и куэдагъым нэхъыбэу щыхэхъуащ Шэшэным (процент 74-кIэ), Ставрополь крайм (процент 24-кIэ), Осетие Ищхъэрэ – Аланием (процент 13-кIэ).

«Дызэрыт илъэсым и япэ мазихым къриубыдэу Кавказ Ищхъэрэм и хьэрычэтыщIэхэм я лэжьыгъэм зрагъэужьын папщIэ ахъшэ щIыхуэу къыIахам сомиплI къэс зыр МСП Корпорацием и шэсыпIэ IэмалхэмкIэ къащтащ. Ауэ мыбдежым къыщыхэгъэщыпхъэщ, апхуэдэм деж езы хьэрычэтыщIэхэр Iуэхум зэрыхэмытыр, псори автомат системэм тету зэрылажьэр. Мыбдежым МСП Корпорациер пщIэншэу шэсыпIэ мэув: комиссэр банкым езым ет.

КИФЩI-м щхьэкIэ МСП Корпорациер щIыналъэхэм шэсыпIэ щхьэхуэу яхуоув икIи ахъшэр здагъэкIуэну IэнатIэхэм щIэупщIэркъым икIи пэрыуэркъым. Мы гъэм шэсыпIэ Iэмалхэр нэхъыбэу къэзыгъэсэбэпар информациемрэ связымрэ пыщIа IэнатIэхэрщ, нэгъабэ елъытауи хуэдихым щIигъукIэ абы хэхъуащ», - къыхигъэщащ МСП Корпорацием и унафэщI Исаевич Александр.

ШэсыпIэ Iэмалхэр зи IэнатIэм нэхъыбэу къыхэзышахэм яхохьэ продукцэхэр къыщIэзыгъэкIхэмрэ абыхэм елэжьхэмрэ (процент 92-рэ), Iуэхутхьэбзэ зэхуэмыдэхэр зылэжьхэр (процент 88-рэ), хьэлъэ къезышэкIхэмрэ хьэпшыпхэр зыхъумэхэмрэ (процент 40), мэкъумэш IуэхущIапIэхэр (процент 34-рэ), узыншагъэр хъумэнымрэ социальнэ IэнатIэхэмрэ (процент 51-рэ), щэнхабзэмрэ спортымрэ (процент 24-рэ).

МСП Корпорацэм и шэсыпIэ Iэмалхэр къызэрагъэсэбэпам къадэкIуэу, 2025 гъэм и япэ мазихым КИФЩI-м и хьэрычэт IэнатIэ мащIэмрэ курытымрэ «МСП Банк»-м кредиту сом меларди 8-м щIигъу иджыри къащтащ. Нэгъабэ и апхуэдэ пIалъэм щыIа бжыгъэхэм елъытауэ хуэдищкIэ ар нэхъыбэщ.