ЕджапIэхэм хуэкIуэ гъуэгухэр

13 августа, 2025 - 09:26
2025 гъэм зэрыщIидзэрэ КъБР-м и щIыналъэ гъуэгу фондым и субсидиемкIэ республикэм и курыт еджапIэщIэхэм ухуэзышэ гъуэгухэмрэ къуажэ уэрамхэмрэ зыхуей хуагъэзэ, къызэщIагъэнахуэ.
«Егъэджэныгъэ» лъэпкъ пэхуэщIэм ипкъ иткIэ Шэджэм, Тэрч къалэхэм, Прималкинскэ жылэм дащIыхьа курыт еджапIэхэм екIуалIэ гъуэгухэм фондым къыхэкIа мылъкур трагъэкIуадэ. Прималкинскэм и уэрамищым лэжьыгъэхэр нобэкIэ щызэфIагъэкIакIэщ, Тэрчрэ Шэджэмрэ къалэхэм я гъуэгухэм асфальт тралъхьэ. Гъэ еджэгъуэщIэм ирихьэлIэу ахэр псори зыхуей хуагъэзэнущ. 
Нартан къуажэм ПащIэм и цIэр зезыхьэ и уэрамымрэ Зэрэгъыж жылэм УнэлIокъуэм и уэрамымрэ къызыхуэтыншэу зэрагъэпэщыжащ. Бахъсэн щIыналъэм хыхьэ Ислъэмейм Сэбаным и цIэр зезыхьэ и уэрамым уэздыгъэхэр щыпадзэ, Надречнэ, Мэзаным и цIэр зезыхьэ, Школьная уэрамхэм тротуархэр къыщыхагъэщхьэхукI. 
Мы гъэм и бадзэуэгъуэм фондым иджыри ахъшэ къыхэкIащ, Бахъсэн къалэм и Парковэ уэрамдэкIыр, Хьэтуей къуажэм Бэраум и цIэр зезыхьэ и уэрамыр зыхуей щыхуагъэзэн, Псыхъурей жылэм километри 6,5-рэ зи кIыхьагъ гъуэгур къызэщIагъэнэхун папщIэ. Мы лэжьыгъэхэр зыгъэзэщIэнухэр къызэрыхах зэхьэзэхуэхэр иджыпсту ирагъэкIуэкI. 
Псори къапщтэмэ, 2025 гъэм километр 22-рэ зи кIыхьагъ гъуэгухэр зэIузэпэщ ящIынущ, километр I7-м уэздыгъэхэр щыпадзэнущ. 
АЛЫДЖЫКЪУЭ Руслан.
  • 37 просмотров
Поделиться: