Нартыху IэфIыр траIуантIэ

13 августа, 2025 - 10:37
Къэбэрдей-Балъкъэрым и «Зеленая компания» IуэхущIапIэм щIидзащ нартыху IэфIыр Iуихыжын икIи жыджэру абы йолэжь. Нартхэм я шхыныгъуэ гуакIуэр консерву тезыIуантIэу ди республикэм щыIэр а зырщ. Нартыху IэфIыр абы езым щегъэкI Бахъсэн, Прохладнэ, Май щIыналъэхэм икIи псори зэхэту гектар миным щIигъу ирегъэубыд. 
«Зеленая компания»-м нартыху IэфIыр гъущI банкIхэм ирелъхьэ икIи бренд цIэрыIуэм щIэту къыщIегъэкI. Псалъэм папщIэ, нэгъабэ абы триIуэнтIащ банкI мелуан 42,3-рэ. 
Къэбгъэлъагъуэмэ, республикэм псори зэхэту къыщыщIагъэкI хадэхэкI, пхъэщхьэмыщхьэ консервым и процент I2-р нартыху IэфIым еубыд икIи, ди деж имызакъуэу, абы ущрихьэлIэнущ къэралым и адрей щIыналъэхэм я сату щIыпIэ куэдым. 
 
        ДжэдыкIэр куэду кърах
2025 гъэм и щIышылэм – мэкъуауэгъуэм къриубыдэу Къэбэрдей-Балъкъэрым и мэкъумэш, фермер, уней IуэхущIапIэхэм зэхэту джэдыкIэу кърахам и куэдагъым проценти 8,4-кIэ хэхъуащ. ЖыпIэнурамэ, зы джэдым хуэзэу джэдыкIи I03-рэ кърахащ. 
Дызэрыт илъэсым и япэ мазихым къриубыдэу республикэм и мэкъумэш IуэхущIапIэхэм псоми зэхэту джэдкъаз щхьэ бжыгъэу яIыгъам проценти 7,3-кIэ хэхъуащ икIи мелуани 2,7-рэ хъуащ. А пIалъэ дыдэм псоми зэгъусэу джэдыкIэу мелуан 20,2-рэ кърахащ. 2024 гъэм и щIышылэм - мэкъуауэгъуэм щыIа бжыгъэхэм нэхърэ проценти 6,5-кIэ нэхъыбэщ ар. 
ХЬЭЩЫКЪУЕЙ Олег.
  • 76 просмотров
Поделиться: