Анэр нэм хуэдэщ…

Анэ… ЛъагъуныгъэшхуэкIэ гъэнщIа а псалъэм и къарур къыпхуэмылъытэнщ. А цIэр зезыхьэ цIыхум нэхъ лъапIэ дунейм теткъым, ар зи щIыбагъ къыдэтым нэхъ насыпыфIи щыIэкъым. Анэм и хуабагъэрщ, гуапагъэрщ, IэфIагъэрщ дунейр зэтезыIыгъэр. А бзылъхугъэ лъапIэм гъащIэм щигъэзащIэ мыхьэнэм я IэдакъэщIэкI куэд траухуащ тхакIуэхэм. Анэмрэ бынымрэ я лъагъуныгъэм нэхъ къабзи, нэхъ къуэпс быди зиIэ щыIэкъым. Аращ зытеухуар ГъукIэ-Мэремкъул Маринэ и «Анэр нэм хуэдэщ...» новеллэри.

… Зауэ губгъуэм ит сэлэтыр биишэ къыхуэкIуэм IэщIэкIыфакъым. МафIэ бзийуэ, щIалэм и гъуэгум ажалыр къытеувэри, гугъэу иIари, насып зыщIэхъуэпсари илыпщIащ. Къарууншэ зэуэ хъуа лъакъуэхэм ямыIыгъыжу, сэлэтыр ехуэхащ. Къызэрымытэджыжынур къыгурыIуэ пэтми, мащIэу пыгуфIыкIри, зэхэпх къудейуэ къиIущэщащ:

- Уэр папщIэ гъащIэр стыныр си дежкIэ щIыхьщ, си Лъахэ-Анэ!

А дакъикъэм, мы дунейм къытезыгъэхьа цIыхум и гур зэрыхэщIынури къыгурыIуэрти, пещэж:

 - Мамэ, къысхуэгъэгъу… Умыгъ закъуэ….

… Дунейм къызэрытехьэрэ дакъикъипщI фIэкIа мыхъуа щIалэ цIыкIур хъыдан жэрумэм IэкIуэлъакIуэу кIуэцIалъхьэ. Ар «хьэщIэ лъапIэщи», дохутырхэми къыкIэлъажыхь, ягъафIэ. Ауэ, гъэщIэгъуэныракъэ, зыкIи арэзы яхуэщIыркъым…

- Мамэ, мамэ сефтыж, - мэшхыдэ ар… Ауэ, зэкIэ абы и бзэр зыми къагурыIуэркъыми, гъы макъыущ зэрызэхахыр.

- Мы цIыху хамэ къомыр хэт сымэ? Мамэ, мамэ даIэ? – нэхъ иныжу и макъым зрегъэIэт.

Сабийр зыхуей хуагъэза нэужь, анэм хуахьыжри, и IэплIэм иралъхьэж. Асыхьэтым и гъы макъри печыжри, и нэ цIыкIухэри зэтрепIэ.

- Мамэ… Мамэ сыкъищтэжащ…

… Нобэ мы пэшым щIэс зэщхьэгъуситIым «я зэхуаку джэду фIыцIэ дэжащ». Псалъэ гуауэхэм унащхьэр трач. ЦIыхухэм хьэл мыгъуэу зэрытхэлъщи, дыкъэгубжьамэ, дызыхуэмей Iэджэ жыдоIэ. Мыбыхэми аращ ящIэр…

- Услъагъу хъуркъым…

- Уэращ псори зи лажьэр…

- Сэ зыкIи сыкъуаншэкъым…

А псалъэхэр зи гум щIыхьа лъагъуныгъэми «зигъэпщкIуауэ къуэгъэнапIэм къуэсщ».

Иджыри зы псалъэ, псалъитI, бжэ едзылIэ макъ…

- Япэ хущIегъуэжым деплъынщ, - шхыдэурэ уэрамым ирокIуэ хъыджэбзыр. – Зы нэпс щIэзгъэкIынкъым! СыщIэгъынури сыт?! Лажьэ сиIэкъым! Къуаншэр ирегъ!

Езыми гу лъимытэжу, сыт щыгъуи абы хузэIуха бжэм къыIухутащ. Уэзджынэр зэрырикъузэу, бжэщхьэIум къытехутащ а унэм и дыгъэр.

- Мамэ… - абы фIэкIа хужымыIэу, хъыджэбзым гъын щIидзащ. Ауэ, мамэ псалъэ лей хуейтэкъым, абы псори къыгурыIуат.

- Умыгъ, тIасэ, иджыпсту хэкIыпIэ гуэр къэдгъуэтынщ, - жиIэри унэм щIишащ…

… Нобэ псоми фIыуэ ялъагъу дохутыр Iэзэр илъэс 60 ирикъурт. А махуэр и бынхэм хуагъэлъэпIэну мурад ящIащи, мыувыIэу къажыхь. Ресторан пэшыр удз гъэгъахэмкIэ гъэщIэрэщIащ, макъамэ дахэм псэр егъэгуфIэ. Пшыхьым къеблэгъат сэбэп зыхуэхъуауэ щыта сымаджэхэр, ныбжьэгъухэр, благъэхэр. Псори мэгуфIэ, мэдыхьэшх.

ИтIанэми, ар зыгуэркIэ нэщхъейуэ къыпщохъу. И бынхэми абы гу лъатащи, щIэх-щIэхыурэ къыбгъэдыхьэурэ къоупщI:

- Мамэ, зыгуэр ухуей? Уигу иримыхьмэ, кхъыIэ, жыIэ!

- Хьэуэ, тIасэ, псори фIы дыдэу фщIащ! – жэуап къетыж.

Мыгувэу бжэр Iуахри, и Iэблэр яIыгъыу, зи ныбжь хэкIуэта цIыхубз къыщIохьэ. Дохутырым ар къызэрилъагъуу, къыщолъэтри абы и деж мажэ.

- Мамэ! Сыту фIыт укъызэрыкIуар! «Сыгукъыдэмыжщ», жыпIати сыгузэващ…

- А-наа, илъэс бгъущIым сыщынэсакIэ, зыгуэри къызэузынщ-тIэ?! Зы сыхьэт сыщысынщи сыкIуэжынщ…

ИтIанэ и пхъум фIыуэ йоплъри, пещэж:

- Мы уи Iупэри сыту плъыжьыщэу бла-тIэ?!

- Мамэ, - мэдыхьэшх дохутырыр. Арат абы къыхуэтыр! Мамэ къакIуэри - псори тэмэм хъужащ…

Мамэ… Сэри щIэх-щIэхыурэ сыноджэ! Сызэхэпхыу-пIэрэ?!