Хэкупсэ нэст

Вэрокъуэ Владимир республикэм и щэнхабзэ гъащIэм хэлъхьэныгъэшхуэ хуищIащ, щIыналъэм и тхыдэм абы и лъэужь дахэ къыхэнащ. Ар пэрытащ  къэрал телевиденэм и IэнатIэ зэмылIэужьыгъуэхэм. КъызэрыгуэкI репортеру къыщIидзэри, къыщалъхуа щIыналъэм, фIыуэ илъагъу къалэм, и хэкуэгъухэм, абыхэм я лэжьыгъэм теухуа фильми I50-м щIигъу тезыха, Совет Союзым и мызакъуэу, къэрал куэдым къыщацIыху кинережиссерым и гъуэгуанэр къызэринэкIащ. Абыхэм ящыщщ дунейпсо фестивалхэм утыку къыщрахьа, саугъэт лъапIэхэр зыхуагъэфэща «Чабанский хлеб», «Запах земли», «Я тебя никогда не забуду», «Лакумы по-чегемски», «Город строится», «Улица моего детства», «Выстрел за вами, поручик!» фильмхэр, нэгъуэщIхэри. Вэрокъуэр Къэбэрдей-Балъкъэрым ЩэнхабзэмкIэ и фондым и тхьэмадэу илъэс куэдкIэ лэжьащ.  А псом къыдэкIуэу ар икIи тхакIуэ Iэзэт. Абы къыдигъэкIащ тхылъ зыбжанэ. Апхуэдэхэщ «Цветные сны» (I998), «Мелодия старой скрипки» (2002), «Прощающие да простят» (2003), «Тайники» (2005), «Лица кавказской национальности» (2005), «С солнцем в крови» (2006), «Непрестанно ищу жемчуга» (20II), «Плачьте с плачущими, смейтесь со смеющимися» (20I2), нэгъуэщIхэри. «Прощающие да простят» («Амыщ къуажэ») романыр адыгэбзэкIи инджылызыбзэкIи дунейм къытехьащ. Ворокъуэм къыхуагъэфэщащ Къэбэрдей-Балъкъэрми Урысейми я щIыхьыцIэ лъапIэхэр, щIыхь, фIыщIэ тхылъхэр.
Ар фIыуэ зыцIыхуу щатхэм абы теухуауэ жаIахэм фыщыдогъэгъуазэ.
Шакъ Елбэрд: Вэрокъуэ Владимир жыджэрагъышхуэ зыхэлъ  лэжьакIуэ емызэшт. Режиссурэм и гъащIэр ирипхами, абы зыкъигъэлъэгъуащ зи хъэтI щхьэхуэ зиIэж тхакIуэ Iэзэуи. Владимир и «Прощающие да простят», «Мелодия старой скрипки», «Цветные сны» тхылъхэм еджэн щIэбдзамэ, апхуэдизкIэ узыIэпашэри, пхузэмыгъэтIылъэкIыжу нэхъ псынщIэу зэрыщIэбджыкIыным ухущIокъу. ИужькIи, гъащIэм узыщрихьэлIэ Iуэхугъуэхэм елъытауэ, гупсысэхэм куэдрэ уахьэж абы и лIыхъужьхэм я деж. Абы къегъэлъагъуэ Ворокъуэр гъащIэм куууэ кIуэцIрыплъыф цIыхуу зэрыщытар.
Абы ущытепсэлъыхькIэ и гугъу умыщIу къыпхуэгъэнэнукъым КъБР-м щэнхабзэмкIэ и фондым щригъэкIуэкIа Iуэхугъуэ купщIафIэр. Владимир хузэфIэкIащ Къэбэрдей-Балъкъэрым щыпсэу лъэпкъхэм я щэнхабзэ жьэгу къызэригъэпэщын, апхуэдэ щIыкIэкIи республикэм и цIыхухэм зэгурыIуэрэ мамырыгъэрэ яку дэлъу псэуным абы и гуащIи хэлъщ.
Зумакуловэ Танзиля: Кавказыр сыт щыгъуи цIыху зэчиифIэхэмкIэ къулейщ. Апхуэдэхэщ Гамзатов Расул, КIыщокъуэ Алим, Кулиев Къайсын сымэ. Абыхэм сэ ябгъурызогъэувэ Ворокъуэ Владимири. Ар сыт и лъэныкъуэкIи цIыху зэчиифIэщ. Урысей щэнхабзэм и зыужьыныгъэм къыпхуэмылъытэну и гуащIэшхуэ хилъхьащ Вэрокъуэм. Абы и очеркхэм, теленэтынхэм, тхыгъэхэм, рассказхэм, фильмхэм гъащIэм и пэжыр къыщыгъэлъэгъуащ, ахэр псори зытеухуар езыр къэзыухъуреихь цIыхухэрщ, Iуэхугъуэхэрщ. Аращ абыхэм я мыхьэнэр лъагэ зыщIри. Владимир и «Прощающие да простят» тхыдэ романым куууэ къыщыгъэлъэгъуащ зауэм къишэ гуIэгъуэмрэ мамырыгъэм и лъапIагъымрэ. Ар куэдым ухуэзыгъэIущ, гъэсэныгъэ мыхьэнэ зиIэ тхыгъэшхуэщ.
ХьэфIыцIэ Мухьэмэд: Вэрокъуэ Владимир цIыхухэр фIыуэ илъагъурт. Абы и щыхьэтщ цIыху цIэрыIуэхэм теухуауэ и къалэмыпэм къыщIэкIа тхыгъэ куэдхэр. Ворокъуэм къыдигъэкIащ эссехэр, очеркхэр зэрыт тхылъ зыбжанэ.  Псом хуэмыдэу Владимир и IэдакъэщIэкIхэм щигъэлъэпIащ КIыщокъуэ Алим, Кулиев Къайсын, Темыркъан Юрэ, Гамзатов Расул, Идар Гуащэнэ, Зумакуловэ Танзиля, Аиссе, Хьэгъундокъуэ Елмэсхъан, Тэрчокъуэ Къамболэт, Ахъмэт Мусэбий, нэгъуэщIхэри. Сэ къызэчэнджэщурэ, илъэс 30-40 ипэкIэ сызытетхыхьахэм теухуауэ Вэрокъуэм фильмхэр Франджым, Иорданием кIуэурэ, Щамырзэ (Черинэ) Людмилэ, пащтыхь Хъусен бен ТIалал и адыгэ хъумакIуэхэм трихащ. Вэрокъуэр хуэIэрыхуэт режиссер, сценарист, продюсер лэжьыгъэхэм, журналистикэм, жылагъуэ Iуэхухэми жыджэру хэтт. Иужьрей илъэси I0-м абы зыкъызэкъуихат тхакIуэ Iэзэуи. Вэрокъуэ Владимир итха «Амыщ къуажэ» романыр абы и тхыгъэ нэхъыфIхэм ящыщщ.