ЩыIэжкъым а зэманыфIхэр

«Мэшыкъуэ-КМВ» (Псыхуа­бэ) - «Спартак-Налшык» (Налшык) - 0:0 (пенальтикIэ - 4:2). Псыхуабэ. «Центральный» стадион. УФ-м и кубок, «ЩIыналъэхэм я гъуэгуанэ», ЕтIуанэ Iыхьэ. ШыщхьэуIум и 20-м. ЦIыху 780-рэ еплъащ. 

Судья нэхъыщхьэр Гусаков (Кисловодск).
«Мэшыкъуэ-КМВ»: Саганович, Хьэгъур, Саидов, Мачилов, Осадчий (Сайгушев, 46), Умаханов (Абазэ, 59), Селеменев, Кабахидзе (Абакаров, 59), Торосян, Топурия (Халибегов, 79), Накаев (Домоцев, 46).
«Спартак-Налшык»: Къу­мыкъу, КIэдыкIуей, Пириев, Гъуэгузокъуэ, Кенжев, КIэщт (ЛIуп, 63), Жабоев, Пекъу, Балъкъыз (Сарбашев, 83), Блий, Шэрджэс (Лысенкэ,67). 
Дагъуэ къыхуащIащ: Кабахидзе, Умахановым, Торосян, Домоцевым, Лысенкэ, Жабоевым, Гъуэгузокъуэм, Кенжевым.
Урысей Федерацэм и кубокыр къэхьыным теухуауэ 2025 - 2026 гъэхэм екIуэкI зэхьэзэхуэм «ЩIыналъэхэм я гъуэгуанэ» зэпеуэм и ЕтIуанэ Iыхьэм бэрэжьей кIуам щыщIидзащ «Спартак-Налшы­кым». Псыхуабэ къалэм ар щригъэблэгъат етIуанэ дивизионым и «Дыщэ» гупым щы­па­шэ­хэм ящыщ икIи Япэ дивизио­ным кIуэну хущIэкъу «Мэшы­къуэ-КМВ»-м. 
ГъащIэр хьэлэмэту зэхэлъщ. Илъэс пщыкIутху-тIощI ипэкIэ хэт и гугъэнт премьер-лигэм уей-уей щыжезыгъэIэу хэта «Спартак-Налшыкыр» иджы урысей футболым и лъащIэ дыдэм къы­щыхутэну? Абы щыгъуэм щIа­гъуэу ямыцIыхуа Псыхуабэ и командэр иджы япэ лигэм ху­щIокъу. 
Къэра­лым щекIуэкI зэхьэ­зэхуэ­хэм япкъ иткIэ мы гупхэр куэдрэ зэхуэзащ. Совет лъэхъэнэми, иужькIи тепщэныгъэр сыт щы­гъуи зыIэщIэлъар «Спартак-Налшыкращ». Къапщтэмэ, ахэр Урысей Федерацэм щыщыIа зэ­пеуэхэм 22-рэ щызэхуэзати, 10-м ди щIалэхэр щытекIуащ, 6-м зэрытегъэкIуакъым, апхуэдизри фIахьащ. Кубокми хэпщIыкIыу щы­нэхъыфIащ: 2017, 2022 гъэ-хэм щызэпэщIэувати, тIэуми налшыкдэсхэм я хьэрхуэрэгъухэр ирагъэкIуэтэкIащ, сыт щыгъуи 1:0-у хагъащIэри. Иужь дыдэу етIуанэ дивизионым щызэIущIами, «Спартак-Налшыкыр» 2:0-уэ Псыхуабэ щытекIуат. АрщхьэкIэ а псори зэфIэкIа Iуэхущ икIи а зэманыфIхэр щыIэжкъым. АдэкIэ щIэрыщIэу я пщIэр зэфIагъэувэжын хуейуэ аращ.
Мы гъэм къалэнышхуэхэр зы­хуэ­зыгъэувыжа «Мэшыкъуэ-КМВ»-м бэрэжьей кIуам «Спартак-Налшыкым» къыпигъэувакъым и футболист нэхъ лъэщ дыдэхэр икIи абыхэм загъэпсэ­хуну Iэмал яритащ. Псом хуэмы­дэу ди нэ къыхуикIырт я гъуащ­хьауэ нэхъыфI адыгэ щIалэ ­ХъутIэ Анзор дыкIэ-лъыплъыну. Ар къыдэхъулIакъым. Абы щы­гъуэми хьэлэмэтт я щытыкIэр зэбгъэлъагъуну иджыблагъэ «Спартак-Налшыкым» и щIы­хьыр зыхъумахэу иджы «Мэшыкъуэ-КМВ»-м и фащэр зыщыгъыу джэгупIэ губгъуэм ита То-пурие Тенгизрэ Торосян Севадэрэ, иужь сыхьэт ныкъуэм ­кърагъэхьа Абазэ Астемыр сымэ. Дэтхэнэми хъарзынэу зыкъигъэлъэгъуащ, уеблэмэ иужьи-тIым. ЗэIущIэ нэужь пенальтихэр щагъэзащIэм, ди гъуэм топ къыдагъэкIащ. 
Джэгур зэрекIуэкIам и гугъу пщIымэ, командэхэр икъукIэ зэ­рыхэгъэзыхьащ. ЛъэныкъуитIми Iэмал зыбжанэ яIащ текIуэныгъэр зыIэрагъэхьэну. АрщхьэкIэ яхузэфIэкIакъым. ЗэIущIэр 0:0-у щиухым, метр пщыкIузым и деж щыту нэхъыфIыр зэхагъэкIащ. Абдежым хэгъэрейхэм я насып нэхъ къыщикIащ - 4:2. 
Гу лъытапхъэщ мы зэIущIэм ­хухаха зэман нэхъыщхьэм «Спартак-Налшыкым» и гъуэм топ къы­зэрыдамыгъэкIыфам. Ар зы­къомкIэ и фIыгъэщ иужь джэ­гугъуи­щым яхэмыта Къумыкъу Аслъэнбэч гъуэм зэрыдагъэувэжам. Абы мызэ-мытIэу топ гугъу­хэм къаригъэгъэзащ икIи ар зы­лъэгъуа гъуащхьэ­хъумэхэри нэхъ тегушхуауэ утыку итащ. 
АдэкIэ ди щIалэхэм къапэ­щылъщ Урысей Федерацэм футболымкIэ и етIуанэ лигэм и «Б» дивизионым и Япэ гупым ще­кIуэкI зэхьэзэхуэм щыпащэну. Но­бэ, шыщхьэуIум и 23-м, Астрахань къалэм ахэр щыIущIэнущ абы и щIыпIэ командэм.

ХьэтIохъущыкъуей  Аслъэн.