Кхъухьлъатэ гъуэгуанэхэм заубгъу

КъБР-м и Iэтащхьэ КIуэкIуэ Казбек IущIащ Тэтэрстан Республикэм и «ЮВТ АЭРО» авиакомпанием и генеральнэ директор Трубаев Петр.

А IуэхущIапIэм мы гъэм и накъыгъэм къыщыщIэдзауэ тхьэмахуэм къриубыдэу тIэу цIыхухэр къыщрешэкI Къэзан - Налшык - Къэзан гъуэгуанэм. А зэманым къриубыдэу а Iуэхутхьэбзэхэр къагъэсэбэпащ цIыху 2800-м, кхъухь­лъатэхэр ику иту процент 90-кIэ из хъууэ.
А рейсхэр ягъэзащIэ Къэбэрдей-Балъкъэр Республикэм, Тэтэрстаным, къэрал бюджетхэм къыхэкI субсидиехэр къагъэсэбэпу. ЗэкIэ а программэр 2025 гъэм къриубыдэу лэжьэну аращ.  
«Къыхэзгъэщыну сыхуейщ «ЮВТ АЭРО»-р ехъулIэныгъэхэр иIэу илъэсипщI хъуауэ зэ­ры­лажьэр, и кхъухьлъатэхэр Урысейм и къалэ 30-м щIигъум зэрыкIуэр. ДыщызэIущIам ды­теп­сэ­лъыхьащ дызыхуэкIуэ илъэсми диIэну зэпы­щIэныгъэхэм. Къапщтэмэ, Къэзан - Налшык - Къэзан гъуэгуанэм тет кхъухьлъатэхэр адэкIи зэрылэжьэнум, абы нэмыщI Уфа, Сочэ къалэхэм кхъухьлъатэхэмкIэ цIыхухэр кIуэфу щы­тыным», - щитхащ КIуэкIуэ Казбек и телеграм-каналым.