ЗэпыщIэныгъэ тынш

Къэралым и хьэрычэт IэнатIэ мащIэмрэ курытымрэ хыхьэхэу, псалъэм папщIэ, хьэщIэщхэм, сату щIыпIэхэм, офис куэду зэхэт ухуэныгъэхэм, нэгъуэщIхэми я IуэхущIапIэхэр дяпэкIэ электросетхэм прагъадзэ хъунущ абы щхьэкIэ тхылъымпIэм тет зэгурыIуэныгъэм Iэ щIамыдзу. А унафэр иджыблагъэ къищтащ УФ-м и Правительствэм. Ауэ апхуэдэ хуитыныгъэхэр зиIэнур IуэхущIапIэхэм ирашэлIэну электрокъарум и лъэщагъыр кВт 150-м къыщыщIэдзауэ кВт 670-м щIезымыгъэгъухэрщ.

Нобэр къыздэсым IуэхущIапIэм электрокъару езышэлIэну мурад зиIэм, зэман куэд абы тригъэкIуадэу, къыкIэлъикIухьын хуей хъууэ щытащ, электросетым и лэжьыгъэри абы къилъахъэрт. Иджы Iуэхур нэхъ тынш хъуащ: интернеткIэ лъэIур ибогъэхьри, лэжьыгъэм текIуэдэну ахъшэр электросетым егъэув, икIи ар зэрепту, лъэныкъуитIым зэгурыIуэныгъэр зэращIылIауэ къалъытэ. Лэжьыгъэр зэрызэфIэкIам щыхьэт техъуэ дэфтэрхэр иужькIэ лъэIу зытхам электросетым и сайтым щиIэ «пэшым» е «Госуслуги»-м и порталымкIэ хуагъэхьыж.
ХэзыщIыкIхэм зэрыжаIэмкIэ, IуэхущIапIэхэмрэ электросетхэмрэ зэхуаIэ хъуа зэхущытыкIэм лэжьыгъэр щIигъэпсынщIэнущ икIи псори нэрылъагъуу щытынущ.