КлассыщIэ къызэIуах

ЩӀэныгъэ

УФ-м ЩытыкIэ къызэрымыкIуэхэмкIэ и министерствэм Къэбэрдей-Балъкъэрым щиIэ къулыкъущIапIэм зыбжанэ лъандэрэ егъэджэныгъэм жэрдэмхэр къыщыхилъхьэу, къыдэкIуэтей ныбжьыщIэхэм я шынагъэншагъэмкIэ дерсхэр, зэIущIэхэр, зэхьэзэхуэхэр къызэригъэпэщу йокIуэкI. Апхуэдэ зы гукъэкIщ иджыблагъэ Май къалэм дэт, дерс щхьэхуэхэр куууэ щрагъэдж курыт еджапIэ №3-м иджыблагъэ къыщызэIуаха IэщIагъэунэтI классыр.

Мы гъэм 5-нэ классым кIуа сабий 25-м курыт щIэныгъэ зэрызрагъэгъуэт программэм къыдэкIуэу, щIэныгъэ гуэдзэмкIэ зэхагъэува программэхэмкIи я еджэныгъэр зэтраублэнущ. Программэм къызэщIиубыдэнущ унэтIыныгъитI – шынагъэншагъэр къызэгъэпэщыным хуэунэтIа дерсхэмрэ псэкупсэ гъэсэныгъэм хуэгъэза лэжьыгъэхэмрэ. Апхуэдэу цIыкIухэм «КъегъэлакIуэ ныбжьыщIэ», «Фочауэ ныбжьыщIэ», «Лъахэхутэ», «МафIэсгъэункIыфIхэм я япэ дэIэпыкъуэгъу», «КъегъэлакIуэ (къызэрырагъэл) Iэмэпсымэхэр», «Япэ медицинэ дэIэпыкъуэгъу», нэгъуэщI дерсхэм сабийхэр щIэдэIуну Iэмал яIэнущ. ЖэрдэмщIакIуэхэм дяпэкIэ я мурадщ «ЗыплъыхьакIуэ ныбжьыщIэхэм я хасэ» къызэрагъэпэщыну, IT-IэщIагъэхэм епха курсхэр къыхалъхьэну, нэгузыужь зекIуэхэр, практикэ лэжьыгъэхэр, зэхьэзэхуэ зэмылIэужьыгъуэхэр ирагъэкIуэкIыну. Дерсхэм я нэхъыбэр УФ-м ЩытыкIэ къызэрымыкIуэхэмкIэ и министерствэм КъБР-м щиIэ къулыкъущIапIэм и Май къалэ къудамэм и IэщIагъэлIхэм я гъусэу ирагъэкIуэкIыну я мурадщ.
ЗэрыгурыIуэгъуэщи, дерсхэр зэрыщыту практикэ лэжьыгъэкIэ гъэнщIауэ щытынущ. IэщIагъэлIхэм ныбжьыщIэхэр хуагъэсэнущ щытыкIэ къызэрымыкIуэм ихуахэм уазэрыдэIэпыкъуну щIыкIэхэм, игъуэджэ къэхъуамэ, абы пэщIэтыну IэщIагъэлIхэм уакъызэреджэнум, къэхъуа шынагъэм цIыхухэр къызэрыхэпшынумрэ абы и лъэужьхэр зэрыбгъэкIуэдынумрэ я Iэмалхэм. ЩIэныгъэр зэи лей хъуркъым, мыпхуэдэ есэныгъэхэр цIыкIухэм гъащIэм къазэрыщыхуэсэбэпынум шэч хэлъкъым.
Абы къищынэмыщIауэ, классым щIэсхэм я дежкIэ курсхэр къыхахыну IэщIагъэмкIэ гъуазэфI хъунущ. ЖэрдэмщIакIуэхэм зэрыжаIэмкIэ, «медицинэ къэхъукъащIэ шынагъуэхэмкIэ къегъэлакIуэ», «зауэлI», «хабзэхъумэ», «компьютер шынагъэншагъэмкIэ IэщIагъэлI» IэщIагъэхэмкIэ пэублэ есэныгъэхэр яIэу сабийхэр еджапIэ къыщIэкIыну Iэмал яIэнущ, щыщIэтIысхьэкIи, а IэнатIэхэр щынэхъыщхьэ еджапIэхэм гулъытэ хэхахэри къыхуащIынущ.
Мы далэм ирихьэлIэу курыт еджапIэмрэ УФ-м ЩытыкIэ къызэрымыкIуэхэмкIэ и министерствэм КъБР-м щиIэ къулыкъущIапIэмрэ зэращIылIа зэгурыIуэныгъэм ипкъ иткIэ, классыр техникэрэ нэрылъагъу IэмэпсымэхэмкIэ къызэрагъэпэщ, еджакIуэхэм щатIэгъэну фащэм и теплъэр яубзыху, егъэджакIуэхэм щIэныгъэ гуэдзэмкIэ программэхэр зэхалъхьэ, гъэсэныгъэ лэжьыгъэмкIэ къапэщылъ пэхуэщIэхэр зэхагъэувэ.
УФ-м ЩытыкIэ къызэрымыкIуэхэмкIэ и министерствэм КъБР-м щиIэ къулыкъущIапIэм и жэрдэмкIэ къызэрагъэпэщ классыр къызэрызэIуахым теухуа гуфIэгъуэ зэIущIэхэр щрагъэкIуэкIынур жэпуэгъуэ мазэрщ.