ИлъэситI хъуауэ япэ итщ

Къэбэрдей-Балъкъэрым и промышленность псынщIэм къыщIигъэкI продукцэм и куэдагъымкIэ Кавказ Ищхъэрэм япэ увыпIэр иужьрей илъэситIым щиIыгъщ. 

2025 гъэм и щIышылэм – мэкъуауэгъуэм къриубыдэу а IэнатIэм и продукцэу псори зэхэту сом меларди 4,4-рэ и уасэ нэгъуэщI щIыналъэхэм хурагъэшащ. Нэгъабэ и апхуэдэ пIалъэм щыIа бжыгъэхэм елъытауэ процент 22,1-кIэ нэхъыбэщ ар. КъищынэмыщIауэ, щэкI лIэужьыгъуэу къыщIигъэкIам и куэдагъым хуэди 3-кIэ хигъэхъуащ. 
Къэбэрдей-Балъкъэрым и промышленность псынщIэм нобэ хохьэ IуэхущIапIэу 84-рэ, унейуэ - 180-рэ икIи цIыху мини 3-м щIигъу абыхэм щолажьэ. 
Къыхэдгъэщынщи, КъБР-м и промышленность псынщIэм продукцэ лIэужьыгъуэу 30-м нэблагъэ къыщIегъэкI. Абы хохьэ щэкIхэр, кIэстумхэр, гъуэншэджхэр, курткэхэр, лэжьыгъэм къыщагъэсэбэп щыгъынхэр, тепIэнщIэлъынхэр, щIагъщIэлъхэр, вакъэр, нэгъуэщIхэри. Ди республикэм и мызакъуэу, ахэр хурагъашэ къэралым и адрей щIыналъэ куэдми.