Республикэм и экспорт зэфIэкIхэр къалъытэ

8 сентября, 2025 - 09:11
«Дунейпсо кооперацэмрэ экспортымрэ» лъэпкъ пэхуэщIэр Кавказ Ищхъэрэм и щIыналъэхэм зэрыщагъэзащIэмрэ экспортымкIэ ЩIыналъэ мардэхэр КИФЩI-м щыхэпщэнымрэ теухуа зэIущIэ Налшык къалэм щекIуэкIащ. Абы и лэжьыгъэм хэтащ УФ-м и министерствэхэм, УФ-м Президентым и лIыкIуэу КИФЩI-м щыIэм и аппаратым, Кавказ Ищхъэрэм и щIыналъэхэм я гъэзэащIакIуэ властым, Урысей экспорт центрым (РЭЦ), щIыналъэхэм экспортыр дэIыгъынымкIэ я центрхэм я лIыкIуэхэмрэ хьэрычэтыщIэхэмрэ. 
ЗэIущIэм щыхэплъэжащ къаIэта Iуэхугъуэм ятеухуауэ нэгъабэ ирагъэкIуэкIа лэжьыгъэхэм къарикIуахэм, щытепсэлъыхьащ нобэ зэрехъулIэхэмрэ къапэщылъ къалэнхэмрэ. Апхуэдэуи зэхуэсым щагъэлъэгъуащ Урысей экспорт центрым бжыгъэ лъабжьэ зиIэ и платформэм и зэфIэкIхэр. Абы и фIыгъэкIэ, хьэрычэтыщIэхэм нэхъ тыншу зрагъэгъуэтыфынущ экспортым ехьэлIауэ щыIэ щIыналъэ Iуэхутхьэбзэхэмрэ къэрал дэIэпыкъуныгъэхэмрэ.
«Къэбэрдей-Балъкъэрым и хьэрычэтыщIэхэм я нэхъыбэм я лэжьыгъэр ирагъэжьащ, IуэхущIапIэхэри къызэIуахащ, сом гуэри ябгъэдэмылъу, атIэ, экспортым пыщIа хуэIухуэщIэ куэдым нобэ хэтщ, республикэм и продукцэхэр дунейпсо сату щIыпIэхэм екIуу щагъэлъагъуэ. КИФЩI-м и щIыналъэхэм мы я зэIущIэм хьэрычэт щIэн IэнатIэхэм пэрытхэм Iэмал яритынущ абыхэм ехьэлIауэ лажьэ къэрал дэIэпыкъуныгъэхэр зыхуэдэр зрагъэщIэну, я IэнатIэхэм къыщагъэсэбэпыну», - жиIащ КъБР-м и Правительствэм и УнафэщIым и япэ къуэдзэ Къуныжь МуIэед. 
Урысей экспорт центрым щIыналъэ программэхэр зэщIэгъэуIунымкIэ и унафэщI Радионов Олег къызэрыхигъэщамкIэ, экспортымкIэ ЩIыналъэ мардэхэр Кавказ Ищхъэрэм жыджэру щагъэзащIэ икIи дызэрыт илъэсым и мазийм къриубыдэу Шэшэнымрэ Къэбэрдей-Балъкъэрымрэ япэ ищащ: щIыналъэ мардэу щыIэ II-м щыщу 9-м лэжьэн я деж щыщIадзащ. 
Кавказ Ищхъэрэм и щIыналъэхэм я IуэхущIапIэхэм ящыщу 2024 гъэм екIуэкIа «Илъэсым и экспортер» урысейпсо зэхьэзэхуэм хэтахэм щытекIуахэр щагъэбелджылащ Налшык щекIуэкIа зэIущIэм икIи наIуэ къызэрыхъуамкIэ, абы хэхуащ КИФЩI-м и IуэхущIапIэ зэхуэмыдэу 16.
Экспортер нэхъыфIу къалъытахэм саугъэтхэр иратыжащ КъБР-м и Правительствэм и УнафэщI Мусуков Алий, «Урысей экспорт центрым» и вице-президент Молодцов Александр, УФ-м Промышленностымрэ сатумкIэ и Департаментым и унафэщI Коноваловэ Ольгэ, УФ-м Экономикэ зыужьыныгъэмкIэ и министерствэм КИФЩI-м и социальнэ-экономикэ зыужьыныгъэмкIэ и департаментым и унафэщI Лебедев Дмитрий сымэ. 
ИужькIэ, Къэбэрдей-Балъкъэрым экспортымкIэ и зэфIэкIым зыщагъэгъуэзэну хьэщIэхэр щыIащ республикэм и IуэхущIапIэ зыбжанэм. ЖыпIэнурамэ, ахэр ди деж къыщIэкIуам и щхьэусыгъуэхэм ящыщ зыт а Iуэхугъуэр. 
ЯпэщIыкIэ хьэщIэхэр еблэгъащ хадэхэкIымрэ пхъэщхьэмыщхьэмрэ елэжь, мэрэзей къыщIэзыгъэкI «Агро 07» IуэхущIапIэм. Апхуэдэу гектар I6-м шыгъулдыкъащхъуэр къыщегъэкI абы. АдэкIэ ахэр щыIащ «КъэббалъкъмэкъумэшкъэкIыгъэм». Мыбы пхъэщхьэмыщхьэ къыщагъэкI, абы щолэжь, ар щызэхадз, ашычхэм щралъхьэж. Абыхэм къадэкIуэу, IэфIыкIэ фабрикэхэмрэ сабийхэмрэ папщIэ мыIэрысэпсхэмрэ мыIэрысэ пIытIахэмрэ къыщIегъэкI.
Апхуэдэуи хьэщIэхэм зрагъэцIыхуащ Шэрэдж щIыналъэм щыIэ «Гуэл къащхъуэ ипщэр» турист комплексым и лэжьэкIэр. Мы инвестицэ пэхуэщIэр мэлажьэ 20I9-2020 гъэхэм щегъэжьауэ. Ар ягъэзэщIащ «Кавказ Ищхъэрэ федеральнэ округым зегъэужьын» къэрал программэм ипкъ иткIэ, «КъБР-м Корпорацэ зыужьыныгъэ егъэгъуэтын» IуэхущIапIэр хэту. 
ХьэщIэхэр ялъэгъуамкIэ арэзы хъуащ икIи абыхэм къалъытащ республикэм и IуэхущIапIэхэм я зэпэщыныгъэр, къыщIагъэкI продукцэхэм я фIагъыр, туристхэм хуащIэ Iуэхутхьэбзэхэр икIи къыжаIащ экспорт зэфIэкIыфIхэр щIыналъэм зэриIэр икIи абы зрагъэубгъун щхьэкIэ, IэмалыфIхэри зэрыщыIэр. 
ХЬЭЩЫКЪУЕЙ Олег.
  • 19 просмотров
Поделиться: