КъБР-м и Парламентым и Президиумым и зи чэзу зэIущIэр екIуэкIащ. Псом япэу абы щыхэплъащ республикэм и хабзэубзыху IуэхущIапIэм и Аппаратым и унафэщI къулыкъур зыхуагъэфащэм.
«КъБР-м и Парламентым теухуауэ» КъБР-м и Законым и Iыхьэ 21-м тету, хабзэубзыху IуэхущIапIэм и унафэщI Егоровэ Татьянэ а къулыкъур хуэфащэу къигъэлъэгъуащ Журт Роберт Биберд и къуэр.
Журт Роберт 1962 гъэм Налшык къалэм къыщалъхуащ, Къэбэрдей-Балъкъэр къэрал университетым «правоведение», «экономикэ» IэщIагъэхэр щызэригъэгъуэтащ. Ар щылэжьащ комсомол, парт IуэхущIапIэхэм, КъБАССР-м и Къэрал планым экономист къулыкъур щиIыгъащ, Лениным и цIэр зезыхьэ район финанс къудамэм и унафэщIу, Налшык къалэм и мылъку фондым и унафэщIу лэжьащ.
- Журт Роберт и щIыбагъ лэжьыгъэшхуэ къыдэлъщ: къэрал, хабзэубзыху, суд IуэхущIапIэхэм и гуащIэ ирихьэлIащ, - къыхигъэщащ Егоровэм. Абы жиIащ КъБР-м и Парламентым и япэ зэхуэсым Республикэм и советым и депутату ар зэрыхахыгъар, икIи ЗаконодательствэмкIэ, хабзэм тегъэтынымкIэ, цIыхум и шынагъуэншагъэмрэ хуитыныгъэхэмкIэ комиссэм хэту зэрылэжьар. Апхуэдэуи зэзыгъэкIуж хеящIэм и къулыкъум ар пэрытащ, и гуащIэр къэрал дамыгъэ куэдкIэ къалъытащ.
- Ахэр ди тегъэщIапIэу, КъБР-м и Парламентым и Аппаратым и унафэщI къулыкъум Журт Роберт хуэфащэу къэдгъэлъэгъуэну тфIэигъуэщ. Илъэс куэд хъуауэ лэжьыгъэм зэрыпэрытым къыхэкIыу, абы и зэфIэкIыр а къулыкъум къыщигъэщхьэпэфыну къыдолъытэ, - жиIащ Егоровэм.
Жылагъуэ шынагъуэншагъэмрэ Iулъхьэм пэщIэтынымкIэ Парламентым и комитетым и унафэщI Кривко Михаил дыщIигъуащ Журтыр илъэс 20-м щIигъукIэ судым зэрыщылэжьар, КъБР-м и Суд Нэхъыщхьэм абы щытхъу зэрыщиIар.
Апхуэдэ псалъэ гуапэхэр Журтым хужаIащ КъБР-м и Парламентым хэт фракцэхэм я унафэщIхэми. Депутатхэм Iэ яIэтащ КъБР-м и Парламентым и Аппаратым и унафэщIу Журт Роберт ягъэувыну зэрыарэзымкIэ.
Егоровэ Татьянэ Журтым ехъуэхъуащ ехъулIэныгъэфIхэр лэжьыгъэм щиIэну.
ЗэIущIэм щытепсэлъыхьащ «Административнэ хабзэхэр къызэпемыгъэудынымкIэ КъБР-м и Кодексым зэхъуэкIыныгъэхэр хэлъхьэным теухуауэ», «Егъэджэныгъэм и IуэхукIэ» КъБР-м и Законым и Iыхьэ 10-м зэхъуэкIыныгъэ хэлъхьэным теухуауэ» КъБР-м и законхэм я проектхэм. КъищынэмыщIауэ, депутатхэр къытеувыIащ федеральнэ законхэмрэ УФ-м и щIыналъэхэм къыхалъхьэ жэрдэмхэмрэ.
Депутатхэм къызэщIакъуэжащ хабзэубзыху IуэхущIапIэм къэпщытэныгъэ Iуэхум хыхьэу ирагъэкIуэкIа лэжьыгъэри.
КъБР-м и Парламентым Мэкъумэш IэнатIэмкIэ, щIыуэпсыр къэгъэсэбэпынымкIэ, экологиемрэ дыкъэзыухъуреихь дунеймкIэ и комитетым и унафэщI ТекIушэ Артур къызэхуэсахэр щигъэгъуэзащ «КъБР-м къуажэхэм зэрызыщрагъэужьыр» къэрал программэм зэрелэжьыпхъэм теухуауэ хабзэубзыху IуэхущIапIэм къищта унафэхэр зэрагъэзащIэм.
ПромышленностымкIэ, транспортымкIэ, связымрэ гъуэгу IэнатIэмкIэ комитетым и унафэщI Къалмыкъ Марат тепсэлъыхьащ республикэм и гъуэгухэм я фIагъымрэ шынагъуэншагъэмрэ егъэфIэкIуэнымкIэ «Правительствэм хухах сыхьэтым» къыщащта унафэхэм зэрелэжьым.
ГъуазджэхэмкIэ Кавказ Ищхъэрэ къэрал институтым и махуэшхуэр къызэрыблагъэр къалъытэри, зэIущIэм къыщащтащ КъБР-м и Парламентым и ЩIыхь тхылъкIэ еджапIэ нэхъыщхьэм и лэжьакIуэ зыбжанэ зэрагъэлъэпIэнум теухуа унафэр.
