Ди лъэпкъэгъухэр ягъэгушхуэу

КъБР-м ЕгъэджэныгъэмкIэ и министерствэм Сабий, щIалэгъуалэ творчествэмкIэ и Уардэунэм цIыхубэ къафэхэмкIэ щапхъэ зытрах и «Кавказ пшэплъхэр» ансамблыр хэтащ Тыркум и Измит къалэм щекIуэкIа «Пишмание» XIII дунейпсо фестивалым, Урысеймрэ Къэбэрдей-Балъкъэрымрэ щэнхабзэмкIэ я лIыкIуэу.

 Мы гъэм фестивалым хэтащ Алыджым, Италием, Румынием, Тыркум, Урысейм щыщ IуэрыIуатэ гупхэмрэ артистхэмрэ. Зэхуэсахэм ягъэзэщIа къафэхэмрэ уэрэдхэмрэ и щыхьэтщ лъэпкъхэм я щэнхабзэ хъугъуэфIыгъуэхэр яхъумэну яужь зэритым.

 «Кавказ пшэплъхэр» ансамблым дежкIэ мы фестивалыр гъэунэхуныгъэ тIуащIэт: япэрауэ, утыкушхуэм я зэфIэкI щагъэлъэгъуэн хуейт; етIуанэрауэ, Тыркум щыпсэу ди лъэпкъэгъухэр ягъэгушхуэн къалэн къазэрыпэщылъри ящIэрт.

Фестивалыр къызэригъэпэщащ Измит къалэ муниципалитетым, мэр Хюрриет Фатмэ Каплан я дэIэпыкъэугъуу. Зэхыхьэм и фIэщыгъэр – «Пишмание» - тырку лъэпкъ IэфIыкIэщ. А шхыныгъуэр гъэхьэзырыным теухуауэ къызэрагъэпэща мастер-классми яфIэгъэщIэгъуэну хэтащ ди артист ныбжьыщIэхэр.

Урысейми Къэбэрдей-Балъкъэрми цIыхубэ къафэхэмкIэ щапхъэу къыщалъыта «Кавказ пшэплъхэр» сабий ансамблым къэралым и цIэкIэ мызэ-мытIэу икIи ехъулIэныгъэхэр иIэу зыкъыщигъэлъэгъуащ дунейпсо утыкухэм. Гупыр къызэрызэрагъэпэщрэ илъэс 35-рэ зэрырикъур артистхэм нэгъабэ ягъэлъэпIащ. Ансамблыр я лауреатщ урысейпсо, дунейпсо зэхьэзэхуэ пщIы бжыгъэхэм.

ТЕКIУЖЬ Заретэ.