ЩIэныгъэмрэ спортымрэ зэпащIэ

30 сентября, 2025 - 06:58
«ЛIыхъужьхэм я лигэ» фIэщыгъэр зэрихьэу илъэс етIуанэ хъуауэ КъБР-м алыдж-урым бэнэкIэмкIэ щрагъэкIуэкI щIэныгъэ-спорт республикэ зэхьэзэхуэм и япэ Iыхьэр Тэрч къалэм щызэхэтащ. Ар къызэрагъэпэщащ КъБР-м ЩIалэгъуалэм я IуэхухэмкIэ, СпортымкIэ и министерствэхэм икIи абы щызэпеуащ илъэс 14 зи ныбжьхэмрэ нэхъыщIэ бэнакIуэхэмрэ. 
Фигу къэдгъэкIыжынщи, «ЛIыхъужьхэм я лигэ» зэхьэзэхуэм и къалэн нэхъыщхьэр, спортымрэ физкультурэмрэ ныбжьыщIэхэр дегъэхьэхыным къыдэкIуэу, хэкупсэу къэгъэтэджынымрэ къэралымрэ щалъхуа лъахэмрэ я тхыдэхэр куууэ егъэщIэнымрэщ. Спортсменхэм мыбдеж къыщагъэлъагъуэ зэфIэкIхэр зэхьэзэхуэм къыщахьыну баллхэм хэгъэхьэнущ. 
Иджы екIуэкIа зэIущIэм командэу 8 хэтащ икIи абыхэм я зэпеуэхэмрэ «акъыл зэхэдзэмрэ» къарикIуахэр зэхалъхьэжа нэужь япэ увыпIэр иратащ Тэрч районым и командэм, етIуанэр – Налшык къалэм и лIыкIуэхэм, ещанэмрэ еплIанэмрэ Дзэлыкъуэ, Шэджэм щIыналъэхэм икIахэм ялъысащ.
Республикэ щIэныгъэ-спорт зэхьэзэхуэр екIуэкIынущ фокIадэм и 20-м къыщыщIэдзауэ щэкIуэгъуэм и 8-м нэсыху, абы хэтынущ КъБР-м и щIыналъэ псоми я командэхэр икIи зэпеуэхэм я Iыхьэ псори зэфIэкIа нэужь япэ увыпIиплIыр къэзыхьахэр кIэух зэIущIэхэм щызэхьэзэхуэнущ. 
 
Конев Виталий ягу къагъэкIыжу
«Петербург и бжьыхьэ» фIэщыгъэр зэрихьэу Санкт-Петербург къалэм и «Юбилейный» спорт комплексым щекIуэкIащ каратемкIэ дунейпсо, урысейпсо зэхьэзэхуэхэр. Ар и фэеплъу щытащ Санкт-Петербург каратемкIэ и федерацэм и тхьэмадэу илъэс куэдкIэ лэжьа Конев Виталий.
Зэхьэзэхуэхэм щызэпеуащ УФ-м и щIыналъэхэм ящыщу 33-м, Белоруссием, Къэзэхъстаным, Узбекистаным, Ираным, Ермэлым, нэгъуэщI къэралхэми я спортсмен, щIалэхэри хъыджэбзхэри зэхэту, I000-м щIигъу. 
Къэбэрдей-Балъкъэрым и щIыхьыр яIэту Санкт-Петербург къалэм щыIащ республикэм и спортсмен гуп икIи абыхэм ящыщу Бежан Идар, Зыхъуэ Кемран, Сыжажэ Дамир, Гузеев Къантемыр сымэ дыщэ медалхэр къахьащ. 
Сибэч БетIал, Сейнов Дамир, Къэзанш Артур, Нэгъуей Алинэ сымэ етIуанэ хъуащ. Глашев Мухьэмэд, Гузеев Темырлан, Блий Эмир, Мачановэ Iэминэ, Губэшы Аскэр, Чужинов Тимур сымэ домбеякъ медалхэр къахьащ.
 
Токио зыхуагъэхьэзыр
Урысей Федерацэм карате-кекусинкаймкIэ пашэныгъэр къыщыхьыным хуэунэтIауэ 2I-нэ зэхьэзэхуэ Мэзкуу къалэм щекIуэкIащ. Абы щызэпеуащ къэралым и щIыналъэхэм ящыщу 28-м я спортсмен, щIалэхэри хъыджэбзхэри зэхэту, 600-м нэблагъэ. Зэхьэзэхуэм япэ увыпIищыр къыщызыхьахэм Iэмал ягъуэтащ дунейпсо зэпеуэм я зэфIэкIхэр щагъэлъэгъуэну. 
Къэбэрдей-Балъкъэрым и спортсменхэм ящыщу Романенкэ Иван етIуанэ, Пасанов Iэдэм-хьэжы ещанэ увыпIэхэр зэпеуэм щаубыдащ икIи мы гъэм щэкIуэгъуэм икIэхэм Японием и къалащхьэ Токио щекIуэкIыну дунейпсо зэхьэзэхуэм тIури хэтынущ.  
Ди щIалэхэм я тренерхэр Къармокъуэ Амурбэч, Маршэнкъул Къантемыр, Будаев Казбек сымэщ. 
 
  Къумахуэ Тимур и япэ медаль
«Bangtao Brawl 4» фIэщыгъэр зэрихьэу Таиландым и Пхукет хытIыгум и «Bangla Boxing Stadium» стадионым щекIуэкIащ тай боксымкIэ рейтинг баллхэр щат зэхьэзэхуэ. 
Къэбэрдей-Балъкъэрым и спортсмен, килограмм 65-рэ зи хьэлъагъхэм я деж щызауэ Къумахуэ Тимур япэу зыхэта мыпхуэдэ зэхьэзэхуэ иным щытекIуащ. ЗэIущIэм хухаха зэманыр икIэм нимыгъэсу хэгъэрейхэм я спортсменыр ди щIалэм хигъэщIащ етIуанэ раундым.
Тимур и тренерхэр КъБР-м зэзауэ зыхэт спорт лIэужьыгъуэхэмкIэ и федерацэм и тхьэмадэ ПщыукI Залимрэ Къумахуэ Русланрэщ. 
КЪУЭЖЕЙ Алим.
  • 41 просмотр
Поделиться:

Читать также:

12.10.2026 - 14:32 → Дыщэ медалу тху
12.10.2026 - 14:29 → Спорт хъыбархэр
06.10.2026 - 18:51 → Спорт хъыбархэр
05.10.2026 - 17:00 → Спорт хъыбархэр
04.10.2026 - 16:38 → Спорт хъыбархэр