Сатушы Мадинэ Токио кIуэным зыхуегъэхьэзыр

1 октября, 2025 - 09:00
Тэмэму зэхэзымыххэр зыхэт спорт лIэужьыгъуэхэмкIэ дунейпсо комитетым къыбгъэдэкIыу УФ-м Сурдлимп джэгухэмкIэ и комитетым фокIадэм и I7-м хъыбар гуапэ къыIэрыхьащ - Урысей Федерацэм тхэквондомкIэ (ВТФ, Олимп джэгухэм хыхьэ лIэужьыгъуэмкIэ) и спортсменхэр Японием и къалащхьэ Токио мы гъэм щекIуэкIыну джэгухэм ирагъэблагъэ. Ди тхэквондистхэр абы хэтынущ зыщыщ къэралыр къэмыгъэлъэгъуауэ.
Урысей Федерацэм и командэ къыхэхам спортсмен 36-рэ хэтынущ икIи, ди гуапэ зэрыхъущи, абыхэм яхэхуащ тхэквондомкIэ дуней псом и чемпион Сатушы Мадинэ. 
Сурдлимп джэгухэр Токио къалэм щызэхашэнущ щэкIуэгъуэм и 15 - 26-хэм икIи абы щызэпеуэнущ къэрал 70-м я спортсмен, щIалэхэри хъыджэбзхэри зэгъусэу, 3000-м щIигъу. Зэхьэзэхуэхэр спорт лIэужьыгъуэ 21-кIэ екIуэкIынущ, медаль комплекту 212-рэ щагъэджэгунущ. 
Ди къэралым и командэ къыхэхам хэту Сатушы Мадинэ иджыпсту зэхьэзэхуэм зыхуегъэхьэзыр, УФ-м щIыхь зиIэ и тренер Ахъмэт Амир и гъусэу.
ХЬЭЩЫКЪУЕЙ Олег.
  • 31 просмотр
Поделиться: