КIэмпIарэ Марат къыпэлъэщын къахэкIакъым

ФокIадэм и 27 - 29-хэм Новосибирск къалэм и «Сыбыр Аренэм» щекIуэкIащ алыдж-урым бэнэкIэмкIэ 4-нэ дунейпсо зэ­хьэзэхуэ. Ди гуапэ зэрыхъущи, Къэбэрдей-Балъкъэрым и ­бэнакIуэ КIэмпIарэ Марат дыщэ медаль абы къыщихьащ. 

Килограмми 130-рэ зи хьэлъагъхэм я деж щыбанэ тэрч щIалэм финалым къыщыпэщIэтащ Белоруссием и спортсмен Зарубский Дмитрий икIи, и IэзагъкIэ ефIэкIыу, ар къыфIихьащ. КIэмпIарэм и тренерхэр КIыщ Муратрэ Щомахуэ Хьэжмуратрэщ. 
КIэмпIарэ Марат нэмыщI, Къэбэрдей-Балъкъэрым и лIыкIуэу зэхьэзэхуэм бэнакIуэ 11 щыIати, КъайцIыкIу Ахьмэд ди командэм иджыри зы медаль къыхуихьащ. Килограмм 77-рэ зи хьэлъагъхэм я деж ар ещанэ щыхъуащ. ЩIалэм и тренерыр Гугъуэтыж Мухьэмэдщ. 
Иджы екIуэкIа зэхьэзэхуэр Совет Союзым и ЛIыхъужь Аксе­нов Александр и фэеплъу щытащ икIи абы щызэпеуащ Урысей Фе­дерацэм и щIыналъэхэм ящыщу 30-м, Азербайджаным, Ермэ­лым, Белоруссием, Ираным, Италием, Къэзэхъстаным, Кубэм, Къыргъызым, Таджикистаным, Тыркум, Узбекистаным я бэнакIуэ 260-рэ. 
Къэбгъэлъагъуэмэ, ди къэралым и командэм хэтащ УФ-м дунейпсо классымкIэ спортым и мастеру 21-рэ, спортым и мастеру 107-рэ.