Электрокъарур щIыпачын щхьэусыгъуэхэр ягъэмащIэ

Дызэрыт илъэсым и щIышылэм – бадзэуэгъуэм къриубыдэу «Къэббалъкъэнерго» IуэхущIапIэм и IэщIагъэлIхэм республикэм и электрокъару IэнатIэм и инфраструктурэр зэгъэпэщыжынымкIэ лэжьыгъэшхуэ ирагъэкIуэкIащ, къитащ КъБР-м ПромышленностымкIэ, энергетикэмрэ сатумкIэ и министерствэм.

Лэжьыгъэхэм къызэщIрагъэубыдащ электрокъару зэрыкIуэ кIапсэу псори зэхэту километри 104-рэ: вольт лъагэ зрикIуэм хуэдэхэр километр 21-рэ хъуащ, электрокъарур зэбгрызытыкI линием хыхьэхэр - километр 83-рэ.

Мыдрейуэ, ди щIыналъэм и электрокъару IэнатIэр ирагъэфIакIуэу, пкъоущIэу 700 ягъэуващ, ди къэралым къыщыщIагъэкIа, иджырей мардэм къитIасэхэмкIэ зэрахъуэкIащ изолятору мини 2,2-рэ, ток кIапсэщIэу яшэщIащ километр 57,6-рэ.

IэнатIэр егъэфIэкIуэным хохьэ кIапсэхэр щыIэ мардэхэм  хуэгъэкIуэныр, уэздыгъэр къэзыгъэсэбэпхэм ар зэпымыууэ яIэрыхьэу щытыныр, электрокъарууэ яфIэкIуэдыр гъэмэщIэныр. А лэжьыгъэхэр тэмэмэу зэфIыхьэмэ, дуней къэхъукъащIэ мыщхьэпэхэм щхьэкIэ электрокъарур щIыпачын щхьэусыгъуэхэр нэхъ мащIэ хъунущ, абы и фIагъми хэхъуэнущ, щыжаIащ министерствэм.

                                                                                     ХЬЭЩОКЪУЭ Алыдж.