Ибрэхьим Бегъымбарым къыдэкIуа, Тхьэр зыгъэзакъуэ динищым зэтехуэу хэтщ Яхья лъапIэм и цIэр. Ар нэхъ гъунэгъуу зэдгъэцIыхунымкIэ сэбэп къытхуохъу Ибн Кэсир и тафсир цIэрыIуэр. ЗэрытщIэщи, Яхья къызыхуэхъуар бын къыщIэмыхъуэу жьы хъужа Зэчрей бегъымбарырщ. Ар зэрыхъуар КъурIэн лъапIэм и Iэят зыбжанэм къыщокIуэ.
«Алыхьталэм «Яхья» зи цIэ щIалэ цIыкIу узэриIэнумкIэ уегъэгуфIэ, а цIэр иджыри къэс зыми фIэтщакъым», - къыжриIа нэужь, Зэчрей къэуIэбжьауэ жэуап иритащ: «Си Тхьэ! Дэнэ сэ щIалэ цIыкIу къыздисхынур, си щхьэгъусэм бын къыщIэхъуэркъым, сэри кхъахэ сыхъуащ». ЗэрыжаIэмкIэ, Зэчрей а зэманым илъэс 70 хъуакIэт. АрщхьэкIэ жэуап къыхуэкIуащ: «Ар къэхъунущ! Уи Тхьэм жиIащ: «Ар си дежкIэ тыншщ, уэри укъэзгъэщIын ипэ ущыIакъым».
«А псалъэхэр къызэрыбгурыIуэн хуейращи, - жеIэ Ибн Кэсир, - Си къарур апхуэдизкIэ инщи, къуэ уэстынри схузэфIэкIынущ, жьы ухъуа щхьэкIэ къэмынэу».
Мы хъыбарыр куэдым куэдрэ жаIэжащ, ауэ дигу къыщIэдгъэкIыжыр Ибн Кэсир Яхья бгъэдэлъа щэныфIагъым хужиIахэр зэдгъащIэу, дэри щапхъэ зыхуэтщIын папщIэщ.
Бегъымбар лъапIэу щэлатымрэ сэламымрэ зэхам жиIауэ къаIуэтэж:
«Зэчрей и къуэ Яхья Алыхьталэм Iуэхугъуитхум тетыну, журтхэми апхуэдэ унафэ яхуищIыну къыжриIат. ЩIалэм зрилъэфыхьырти, Хьисэ лъапIэм къыжриIащ: «Iуэхугъуитхум утетыну, ар журтхэми зыхебгъэлъхьэну къыщыбжиIакIэ, гъэзащIэ ар, армыхъумэ, сэ яжесIэнущ».
Яхья жиIащ: «Уа си къуэш, си япэ уищмэ, щIым сыщIилъэфэнкIэ е тезыр къыстехуэнкIэ сошынэ». Арати, Яхья журтхэр Къудус Iуащхьэм деж щызэхуишэсщ, Тхьэм фIыщIэ хуищIри, псэлъэн щIидзащ: «Тхьэ Лъагэм Iуэхугъуитхум сытетыну, фэри абы фыкъыхуезджэну унафэ къысхуищIащ. Япэрауэ, Тхьэм фыхуэпщылI, Абы гуэгъу иIэуи фи фIэщ фымыщI. Алыхьым фыкъигъэщIри, фызыхуей псори къывитащи, фыхуэжыIэщIэ, нэгъуэщI къэвмылъыхъуэу! Нэмэз фщIы, сыту жыпIэмэ, Алыхьым и гупэр зыхуигъазэр Езым къелъэIу и пщылIырщ. Аращи, нэгъуэщIыпIэкIэ зывмыгъазэ. Иджыри унафэ фхузощI нэщI фIыгъыну. НэщI ис цIыхур мускус зэрылъ къэп цIыкIу зыIыгъым ещхьщ, и мэ дахэр псоми къащIихьэу. Абы и жьэм къыжьэдих мэр Алыхьталэм дежкIэ мускусымэм нэхърэ нэхъ гуакIуэжщ.
Иджыри фыкъыхузоджэ сэдэкъэ вгуэшыным, сыту жыпIэмэ, сэдэкъэ зытыр бийм гъэру иубыдам ещхьщ. И Iэхэр и пщэм ирапхри, ар утыкум кърашащ, и щхьэр паупщIыну. АрщхьэкIэ езым жеIэ: «Си щхьэр къэсщэхужмэ, вдэну?» Сэдэкъэр мис апхуэдэ щхьэщэхужыпщIэ хуохъу цIыхум.
Иджыри фыкъыхузоджэ куэдрэ Алыхьу Лъэщыр икIи Лъагэр фигу къэвгъэкIыжыну, сыту жыпIэмэ, апхуэдэ цIыхур бийм ирахужьауэ яхурэ пэт, быдапIэм зыщIэзыдзэу къелам хуэдэщ. ШейтIаным нэхъ щыхъума хъури, нэхъыбэрэ Алыхьталэм и цIэр къизыIуэрщ.
Ахэр игу къигъэкIыжрэ пэт, Бегъымбар лъапIэу щэлатымрэ сэламымрэ зэхам жиIащ: «Сэри Алыхьталэм сызытетыну унафэ къысхуищIа Iуэхугъуитхум фыкъыхузоджэ: фызэгурыIуэ, фыдаIуэ, жыIэщIэу фыщыт, Алыхьым и хьэтыркIэ фыIэпхъуэ (зи гугъу ищIыр ислъам диныр дакъузэу щыщытарщ - Ч. М.), фхузэфIэкI фщIэ. ЗэгурыIуэным зы бжьизкIэ тебэкъукIыр ислъам динми тебэкъукIынущ, пасэрей хабзэжьхэм тетыну мурад зыщIыр жыхьэнмэр зэрагъэплъыну мывэхэм яхэхуэнущ».
- Нэмэз ищIами, нэщI иIыгъами хэхуэну? – жаIэри, еупщIати, жэуап къаритащ:
- Нэмэз ищIами, нэщI иIыгъами, «сымуслъымэнщ» жиIэми».
