Газетхэм, телевиденэм, радиом я фIыгъэкIэ щIыпIэм щызэлъэщIыса мэхъу къэхъукъащIэхэм ятеухуа хъыбар зэмылIэужьыгъуэхэр, цIыхухэр щыгъуазэ мэхъу IэщIагъэлI цIэрыIуэхэм, лъэпкъыр зэрыгушхуэхэм я гъащIэмрэ я лэжьыгъэмрэ. КъинэмыщIауэ, абыхэм яунэтIыф жылагъуэ гупсысэр, цIыхухэм я дуней еплъыкIэр, бэр Iуэхугъуэшхуэхэм къыхузэщIагъэуIуэфу. Апхуэдэ къалэнышхуэхэр игъэзащIэу илъэс 80 лъандэрэ Тэрч щIыналъэм къыщыдокI «Терек-1» район газетыр.
Ар илъэс зэхуэмыдэхэм фIэщыгъэ зэмылIэужьыгъуэхэр иIэу дунейм къытехьами, а газетыр сыт хуэдэ зэмани цIыхубэм пэжу яхуэлэжьащ, къыпэщылъ Iуэхухэр екIуу, пэжыр и лъабжьэу, къызыхуэтыншэу зэфIигъэкIыу. А псоми теухуа зэIущIэ купщIафIэ иджыблагъэ щекIуэкIащ Тэрч щIыналъэм и администрацэм и унэм. Абы Iэтауэ щагъэлъэпIащ газетым и япэ номерыр къыщыдэкIа махуэшхуэр. ГуфIэгъуэ зэхуэсым кърихьэлIат щIыналъэ администрацэм и Iэтащхьэ Хъущт Аслъэнбий, абы и къуэдзэхэмрэ IуэхущIапIэм и къудамэхэм я унафэщIхэмрэ. Апхуэдэу редакцэм и махуэщIыр даIэтыну щIыпIэ журналистхэм яхуеблэгъат КъБР-м бжыгъэр зи лъабжьэ зыужьыныгъэмкIэ, связымрэ цIыхубэ коммуникацэхэмкIэ и министрым и къуэдзэ Гилиев Мурат, КъБР-м и Парламентым и депутатхэу Хьэрэдурэ Заурбий, ЛIэужь Ахьмэд, Бахъсэнокъуэ Залым, КъБР-м и Журналистхэм я зэгухьэныгъэм и унафэщI, «Адыгэ псалъэ» республикэ газетым и редактор нэхъыщхьэ Жыласэ Заурбэч, «Заман» республикэ газетым и редактор нэхъыщхьэ Конаков Хьэсэн, ди щIыналъэм и район газетхэм я унафэщIхэу Доткъул Сэфарбий («Баксанские вести»), Доврановэ Светланэ («Прохладненские известия»), Щокъуий Аминэ («Зольские вести»), Сэхъурокъуэ Асир («Маяк», Аруан район) сымэ. Зэхуэсым хэтащ газетым и ветеранхэр, Тэрч щIыналъэм хыхьэ къуажэхэм я пашэхэр, щылажьэ IуэхущIапIэхэм я унафэщIхэр, жылагъуэ зэгухьэныгъэхэм я лIыкIуэхэр.
ХьэщIэхэр кIэщIу щыгъуазэ хуащIащ газетым къикIуа тхыдэ гъуэгуанэм. ЗэрыжаIамкIэ, район газетым и япэ номерыр 1945 гъэм и фокIадэм дунейм къытехьащ. 1941-1945 гъэхэм екIуэкIа Хэку зауэшхуэм ди къэралым къыщихьа ТекIуэныгъэ иным и щIыхькIэ а газетым «Победа» цIэ екIур, лъагэр, пщIэ зыпылъыр фIэщыгъэ хуащIауэ щытащ. Абы и напэкIуэцIхэм щыбгъуэтынут зауэм пыщIа бэлыхьищэхэр зышэчу мамыр гъащIэм хуэкIуэжа ди къэралым, ДжылахъстэнейкIэ зэджэ Къэбэрдей ЦIыкIум совет псэукIэщIэм и лъабжьэр зэрыщагъэбыдэжым, щекIуэкI ухуэныгъэщIэхэм, щIыналъэ экономикэм и унэтIыныгъэхэм щызэфIах Iуэхугъуэхэм ятещIыхьа хъыбар хьэлэмэтхэр, лэжьыгъэм, социалист зэхьэзэхуэм къыхэжаныкI мэкъумэшыщIэхэм, ухуакIуэхэм, IэщIагъэлI зэмылIэужьыгъуэхэм ятеухуа очерк купщIафIэхэр, нэгъуэщIхэри. ИлъэсипщIым щIигъукIэ апхуэдэ фIэщыгъэр иIэу къыдэкIа нэужь, газетым и цIэр «Во славу Родины» хъури, иужькIэ аргуэру «Победа»-р игъуэтыжащ. 1960 гъэм и пэщIэдзэхэм къыщыщIэдзуэ «Терек» цIэр зэрихьэ хъуащ. ИужькIэ, 1991 гъэм, «Терек-1» фIэщыгъэр игъуэтащ.
Къэралым зэхъуэкIыныгъэ ткIийхэр щыщекIуэкIа илъэсхэм газетыр, адрей IэнатIэ псоми хуэдэу, щытыкIэ гугъум итащ. АтIэми а лъэхъэнэм абы и редактору щыта Беслъэней Владимир и фIыгъэкIэ а лъэпощхьэпохэр къызэринэкIыфащ икIи лэжьыгъэм адэкIи пищащ. Къыхэгъэщыпхъэщ абы ипэжкIэ, лIэщIыгъуэ блэкIам и 80 гъэхэм я кIэухым ирихьэлIэу а район газетым и къыдэкIыгъуэхэр ди республикэм щыяпэу компьютер технологием теувауэ зэрыщытари.
ЩIыналъэм щекIуэкI гъащIэм теухуа хъыбархэр пэжу цIыхубэм ялъэгъэIэсыныр зи лэжьэкIэ мардэ редакцэм и лэжьакIуэхэр дапщэщи жыджэру хэтащ (ноби аращ) щIыналъэм, республикэм и хъыбарегъащIэ IэнатIэхэм щекIуэкI зэпеуэ зэмылIэужьыгъуэхэм. Хэтым и мызакъуэу, ехъулIэныгъэфIхэр зыIэрагъэхьэрт. Апхуэдэу зи цIэхэр фIыкIэ мызэ-мытIэу къраIуахэм ящыщащ журналистхэу, газет лэжьакIуэхэу КIэмпIарэ Галинэ, ЗэрамыщIэ Маринэ, Жылэхьэж Иринэ, Ныбэжь Назир, ТIажь Азэмэт, КIуантIэ Замирэ сымэ, нэгъуэщIхэри.
Мы зэманым газетыр зыужьыныгъэм и гъуэгум тетщ, нэхъыжьхэм ирахьэжьа IуэхуфIхэм пищэу, лэжьыгъэр иригъэфIакIуэу, ехъулIэныгъэщIэхэр зыIэригъэхьэу. «Терек-1»-м и творческэ гупым я пашэщ журналист Iэзэ, лэжьыгъэм и къызэгъэпэщакIуэ IэкIуэлъакIуэ Дадэ Аслъэн. Редактор нэхъыщхьэм и унафэм щIэту, газетым и лэжьакIуэхэм я зэфIэкIрэ щIэныгъэрэ ирахьэлIэ Тэрч щIыналъэм и зыужьыныгъэм, и ехъулIэныгъэхэм.
Илъэс 80 хъуауэ зэпыу имыIэу къыдокI газетыр, цIыхубэм хъыбар щхьэпэхэр яхуихьу, щIыналъэм и лэжьакIуэ цIэрыIуэхэр яригъэцIыхуу. Редакцэм и журналистхэм, газетым и лэжьакIуэ псоми узыншагъэ быдэ яIэну, творческэ зыузэщIыныгъэ дяпэкIи ягъуэтыну, зыпэрыт IэнатIэм гукъыдэж къариту куэдрэ ар ирахьэкIыну ехъуэхъуащ зэIущIэм къекIуэлIахэр. Апхуэдэхэт Хъущт Аслъэнбий, Гилиев Мурат, Жыласэ Заурбэч, ЛIэужь Ахьмэд, Хъаний Владимир, Iэщыж Владимир, ГъукIэпщ Алексей, Дзэгъащтэ Марие, нэгъуэщIхэри. Абыхэм псалъэ гуапэ куэд хужаIащ редакцэм и лэжьакIуэхэм, зи пашэ, зи лIыкIуэ IуэхущIапIэхэм, зэгухьэныгъэхэм къабгъэдэкI щытхъу, фIыщIэ тхылъхэр, фэеплъ саугъэтхэр абыхэм хуагъэфащэу. КъБР-м и Журналистхэм я зэгухьэныгъэм къыбгъэдэкIыу Жыласэ Заурбэч щIыхь тхылъхэр яритащ къызэрыдэкIрэ илъэс 80 ирикъуа «Терек-1» район газетым и лэжьакIуэ гупым, газетым и редактор нэхъыщхьэ Дадэ Аслъэн.
