Жылагъуэ лэжьакIуэхэр къихэтщ, цIыхухэм сэбэп яхуэхъуныр, гъащIэр нэхъ тынш, екIу, дахэ щIыныр, къэзылэжьам хуэфащэр лъыгъэсыжыныр, захуагъэмрэ пэжыгъэмрэ дунейм щытепщэ хъужыныр къалэн нэхъыщхьэу зыхуагъэувыжу. Апхуэдэ цIыхухэр гу къабзэрэ псэ хьэлэлкIэ жылагъуэм яхуолажьэ, абы ифI зыхэлъ Iуэхугъуэхэм я жэрдэмщIакIуэу, зэщIэгъэуIуакIуэу, гъэзэщIакIуэу. Ауэ щыхъукIи, фIыщIэ гуэри пэмыплъэу, хъер, мылъку гуэри я щхьэкIэ къемыуалIэу. Апхуэдэу гъащIэр езыхьэкIхэм ящыщщ зи ныбжьыр иджыблагъэ илъэс 70 ирикъуа Iэщнокъуэ Олег Анурбэч и къуэр. Жылагъуэ лэжьакIуэ емызэшхэм я щапхъэу куэдым къалъытэ хэкупсэ нэсу дунейм тетщ а адыгэлIыр.
УФ-м и Журналистхэм я зэгухьэныгъэм илъэс куэд лъандэрэ хэт, «Зи бжыгъэр мащIэ лъэпкъхэмрэ лъэпкъ къудамэхэмрэ зегъэужьынымкIэ дунейпсо фондым» ди щIыналъэм щиIа къудамэм и лэжьыгъэм хьэрычэт хэзылъхьа Iэщнокъуэм иригъэкIуэкI жылагъуэ лэжьыгъэ щхьэпэхэм ди республикэм и цIыху куэд щыгъуазэщ. Олег и къалэмыпэм къыпыкI тхыгъэ купщIафIэхэр мызэ-мытIэу къытохуэ ди республикэм къыщыдэкI газетхэм, литературэ-художественнэ, жылагъуэ-политикэ журналхэм. Iэщнокъуэм и жэрдэмкIэ КъБР-м и лъэпкъ радиоми телевиденэми куэдрэ къыщызэрагъэпэщ, къат, къагъэлъагъуэ нэтын зэмылIэужьыгъуэхэр.
Хьэтуей адыгэ жылэжьым 1955 гъэм къыщалъхуащ Iэщнокъуэр. КУрыт школыр къиухыу балигъыпIэ иува нэужь, Олег мурад ищIащ мэкъумэш IэщIагъэм хуеджэу IэщIагъэлI нэсу жылэм къигъэзэжыну. ЗыщIэхъуэпса IэщIагъэр ехъулIэныгъэкIэ зригъэгъуэтащ абы. IэщIагъэлI гумызагъэ, жэуаплыныгъэ куу зыхэзыщIэ лэжьакIуэ емызэш, цIыхухэм бгъэдыхьэкIэ къахуэзыгъуэт щIалэщIэр университетым къагъэнэжауэ щытащ, и зэфIэкIхэм адэкIи хигъэхъуэну, и зэхэщIыкIми нэхъри зригъэубгъуну. Iэщнокъуэр илъэс зыбжанэкIэ лэжьащ КъБКъУ-м и проректорым и дэIэпыкъуэгъуу, парт, профсоюз Iуэхухэми жыджэру хэтащ. ЩIэныгъэм хуэнэхъуеиншэ щIалэм, зэрылажьэм хуэдэурэ, къиухыжащ КъБКъУ-м и экономикэ факультетри. ИужькIэ Олег бухгалтер нэхъыщхьэу щыIащ КъБАССР-м ЦIыхухэм Iуэхутхьэбзэ яхуэщIэнымкIэ и министерствэм и автобазэм. Сыт хуэдэ IэнатIэ пэрымытами, ар дапщэщи хущIэкъуащ и къалэнхэр пэжу, нэгъэсауэ зэрызэфIигъэкIыным, дзыхь къыхуащIа IэнатIэр иригъэфIэкIуэным. Жылагъуэ лэжьыгъэ зэмылIэужьыгъуэхэми сыт щыгъуи хуэжыджэращ Олег. Апхуэдэ Iуэхухэм хэту ар щыIащ хамэ къэрал зыбжанэм: Венгрием, Польшэм, Румынием, Франджым, Чехословакием, Югославием, нэгъуэщIхэми.
Нэхъапэм парт, профсоюз лэжьыгъэ зэмылIэужьыгъуэхэр екIуу зыгъэзэщIа Iэщнокъуэр мы зэманым хущIокъу ди республикэм и ехъулIэныгъэм хуэлэжьа IэщIагъэлIхэм, гъащIэм и унэтIыныгъэ зэмылIэужьыгъуэхэм къыхэжаныкIауэ яхуэфэщэн гулъытэ зымыгъуэтыжа нэхъыжьыфIхэм къэрал гулъытэ егъэгъуэтыжыным. Апхуэдэу яхуэфэщэн пщIэ зыгъуэтыжахэм ящыщщ КъБР-м и цIыхубэ тхакIуэ Нало Ахьмэдхъан, КъБР-м и цIыхубэ дохутыр, КъБКъУ-м и медицинэ факультетым илъэс 25-м нэскIэ и декану щыта Щомахуэ Алексей, КъБР-м щэнхабзэмкIэ щIыхь зиIэ и лэжьакIуэ, тхакIуэ цIэрыIуэ Мэлбахъуэ Елбэрд, КъБАССР-м цIыхубэм щIэныгъэ егъуэтынымкIэ и министру, КъБКъУ-м егъэджэныгъэ лэжьыгъэмкIэ и проректору щыта Балъкъэр Борис, РСФСР-м щIэныгъэмкIэ щIыхь зиIэ и лэжьакIуэ, КъБКъУ-м и профессор Къумыкъу Тыгъуэн, КъБР-м и Къэрал саугъэтым и лауреат, философие щIэныгъэхэмкIэ кандидат Бэлэтокъуэ Виталий сымэ, нэгъуэщIхэри. Абыхэм я цIэхэр нобэ зэрахьэ къыщалъхуа жылэхэм, ди республикэм и къалащхьэм я уэрамхэм, фIащащ курыт еджапIэхэм, щыпсэуа унэхэм фIэдзащ я цIэ-унэцIэхэр зэрыт фэеплъ пхъэбгъухэр. Iэщнокъуэм къыхилъхьа жэрдэмыр пэщIэдзэ хуэхъури, ди республикэм и дохутыр цIэрыIуэ зыбжанэм КъБР-м и Парламентым и ЩIыхь тхылъхэр хуагъэфэщащ.
Апхуэдэу Iэщнокъуэр елIэлIащ КъБКъУ-м и профессору, еджагъэшхуэу щыта Боташев Хьэсэн и фэеплъым хуэфэщэн пщIэ егъэгъуэтыным. Ар Къэбэрдей-Балъкъэрым щыщу СССР-м дзюдомкIэ спортым и мастер япэу хъуащ, а спорт лIэужьыгъуэмкIэ ди республикэм и япэ тренеру щытащ, абыкIэ школ хэха япэу къызэригъэпэщащ, балъкъэрхэм ящыщу физико-математикэ щIэныгъэхэмкIэ доктор япэу хъуари аращ. Апхуэдэу Олег и гулъытэ ялъигъэIэсащ КъБР-м щIыхь зиIэ и дохутырхэу Iэщнокъуэхэ Аслъэнбийрэ Исуфрэ, КъБКъУ-м ДизайнымкIэ и колледжым и къызэгъэпэщакIуэ икIи япэ унафэщIу щыта Джэршокъуэ Артур, хирург IэкIуэлъакIуэ Тогузаев Альберт сымэ.
Олег и жэрдэмыр даIыгъыу ди республикэм куэдрэ къыщызэрагъэпэщ зэхыхьэ купщIафIэхэр, хьэлэмэтхэр. Абыхэм я щапхъэщ СССР-м и цIыхубэ егъэдлжакIуэ, СССР-м и Совет Нэхъыщхьэм и депутату щыта Къанщыкъуей Риммэ и щIыхькIэ къызэригъэпэща пшыхь дахэр, ди республикэм и япэ промышленнэ IуэхущIапIэ иным, Нарткъалэ дэт химкомбинатым (иджыпсту «Стандарт-Спирт» ООО) и япэ унафэщIу щыта, парт, совет лэжьакIуэшхуэ, коммунист пэж Iэщнокъуэ Iэмин, УФ-м щIыхь зиIэ и ухуакIуэ, «Стройдеталь» заводым и унафэщIу щыта Бетрожь Къасболэт сымэ я фэеплъхэр щагъэлъэпIа зэхуэсхэр, КъБР-м физическэ щэнхабзэмрэ спортымкIэ щIыхь зиIэ и лэжьакIуэ, бэнэкIэмкIэ Совет Союзым щэнейрэ и чемпион, спортым и мастер Къуэдзокъуэ Анатолэ и щIыхькIэ зэхашэ зэхьэзэхуэхэр, нэгъуэщIхэри.
Хэкупсэ нэсым и фIэщ мэхъу апхуэдэ жылагъуэ лэжьыгъэм и фIыгъэкIэ республикэм и зыужьыныгъэм хэлъхьэныгъэ ин хуэзыщIа ди нэхъыжьыфIхэми езы щIыналъэми я пщIэр нэхъри къэIэта зэрыхъунур. А Iуэхухэм лъэныкъуэ куэдкIэ зегъэужьыпхъэу къилъытэу, республикэм щекIуэкI псапащIэ Iуэхухэми жыджэру холэжьыхь Iэщнокъуэр.
Iэщнокъуэм зэрыжиIэмкIэ, сыт хуэдэ жэрдэм кърихьэжьами, ар тэмэму зэфIэха хъунымкIэ дапщэщи дэIэпыкъуэгъушхуэ къыхуэхъуу къекIуэкIащ «Алан» жылагъуэ зэгухьэныгъэм и тхьэмадэу щыта Беппаев Суфян, Медицинэ лэжьакIуэхэм я жылагъуэ зэгухьэныгъэм и пашэ, дохутыр цIэрыIуэ Бер Мухьэдин, «Налшык» хьэлвэ заводым и унафэщI, КъБР-м и Парламентым и депутат Къудали Мухьэмэд сымэ.
Ди республикэм жыджэру щригъэкIуэкI жылагъуэ-политикэ лэжьыгъэшхуэхэм къапэкIуащ щытхъу, фIыщIэ куэд, КъБР-м и Парламентым, «Алан» Балъкъэр лъэпкъым я жылагъуэ зэгухьэныгъэм къабгъэдэкIа щIыхь тхылъхэри яхэту. АтIэми Iэщнокъуэм и дежкIэ нэхъыщхьэр цIыхубэм я арэзыныгъэрщ, гуапагъэрщ, жылагъуэм къыбгъэдэкI пщIэмрэ нэмысымрэщ. ИпэжыпэкIэ, ахэракъэ-тIэ мы гъащIэм щынэхъапэр?!
