Лэжьыгъэшхуэ кърахьэжьэ

Къэбэрдей-Балъкъэрым Лэжьыгъэмрэ цIыхухэм социальнэ и лъэныкъуэкIэ къащхьэщыжынымкIэ и министерствэм и нэIэ щIэт IуэхущIапIэхэр къызыхуэтыншэу къагъэщIэрэщIэж, иджырей мардэм кърагъэтIасэу, зыхуей-зыхуэфIхэмкIэ къызэрагъэпэщ.

Лэжьыгъэхэр ирагъэкIуэкI «ЦIыхухэм социальнэ дэIэпыкъуныгъэ етын» къэрал программэм ипкъ иткIэ. Мы зэманым зэрагъэпэщыж психоневрологие сымаджэщыр, жьы хъуахэмрэ ныкъуэдыкъуэхэмрэ щыпсэу интернатхэр. Ухуэныгъэхэм я унащхьэхэр зэрахъуэкI. Абыхэм къадэкIуэу, психоневрологие интернатхэм я IуплъапIэхэр къагъэщIэрэщIэж, пэш кIуэцIхэр къыщращIыкI, инженер коммуникацэхэр щызэрахъуэкI.

Иджыблагъэ абы щыIащ КъБР-м лэжьыгъэмрэ цIыхухэм социальнэ и лъэныкъуэкIэ къащхьэщыжынымкIэ и министр Тогузаев ТIэхьир икIи зригъэлъэгъуащ лэжьыгъэхэр здынэсамрэ абыхэм я фIагъхэр зыхуэдэмрэ икIи арэзы техъуащ.

«Иджы едгъэкIуэкI лэжьыгъэхэм я фIыгъэкIэ республикэм социальнэ мыхьэнэ зиIэ и IуэхущIапIэхэм я мылъку-техникэ лъабжьэр догъэбыдэ, къэрал дэIэпыкъуныгъэхэм нэхъыбэу хуэныкъуэхэу абыхэм къакIуэхэм, щыпсэухэм тыншыпIэхэр ягъуэта мэхъу», - жиIащ министрым.