ЩIыналъэхэм зегъэужьыным теухуауэ

УФ-м и Правительствэм и УнафэщIым и къуэдзэ Хус­нуллин Марат ЩIыналъэхэм зегъэужьынымкIэ и комис-сэм и президиумым (штабым) и зэIущIэ иригъэкIуэкIащ. Абы хэтащ КъБР-м и Iэтащхьэ КIуэкIуэ Казбек. ЗэIущIэм щыхэплъащ республикэм и социально-экономикэ унэ­тIыныгъэхэм, инфраструктурэм пыщIа проектхэм ехьэ­лIауэ мыхьэнэшхуэ зиIэ Iуэхухэм.

Зэхуэсым щызэпкърахащ «ГъащIэм хуэщIа инфраст­руктурэ», «ПсэупIэмрэ къалэ щытыкIэмрэ» лъэпкъ про­-ектхэр, апхуэдэуи коммунальнэ IэнатIэм зэхъуэкIыныгъэхэр щегъэкIуэкIыным теухуа программэр гъэзэщIа зэрыхъур.
«Дызэрыт илъэсым республикэм щатащ ухуэныгъэщIэ ­зыбжанэ - еджапIэхэр, амбулаторэхэр. «Унагъуэм зыщIэгъэкъуэн» къэрал проектым ипкъ иткIэ зыхуэгъэхьэзырын щIа­дзащ Гундэлэн, Старэ Шэрэдж, Бахъсэн жылэхэм сабий садхэр щыухуэным. Ахэр ятын хуейщ 2027 гъэм и кIэм. Лышх узыфэр зыпкърытхэм щеIэзэ диспансерым и ухуэныгъэми пыдощэ, - жиIащ КIуэкIуэ Казбек зэIущIэм теухуауэ. - Узыншагъэр хъумэн IэнатIэм мы зэманым щолэжь ухуэныгъиблым, мэкъумэшымкIэ - Бахъсэненкэ къуажэм социальнэ унэтIы­ныгъэ зиIэ IуэхущIапIэхэр щаухуэ, щыIэхэр щызэрагъэпэщыж, «Къарэ-Суу - Бабугент - Къэщкъэтау» псы кIуапIэм бжьамийхэр далъхьэ, Псыхъурей, Псынэдахэ, Аушыджэр ­къуажэхэр зэIузэпэщ ящI. Егъэджэныгъэ, щэнхабзэ IэнатIэхэм епха IуэхущIапIэхэри къызыхуэтыншэу зэрагъэпэщыж.
Къалэр тыншыпIэхэмкIэ къызэгъэпэща хъуным хуэгъэпса щIыналъэ проектым хыхьэу зэIузэпэщ ящIащ жылагъуэ зэхуэсыпIэрэ пщIантIэу 40. Ятащ щIыналъэ гъуэгу 14, абыхэм ящыщу щыр - километр 20,5-рэ хъур - УФ-м и гъуэгу нэхъыщ­хьэхэм ящыщщ. Мы илъэсым къриубыдэу щIыналъэ гъуэгуу зэрагъэпэщыжащ километр 47-рэ хуэдиз, апхуэдэуи лъэс зэпрыкIыпIэу 42-рэ зыхуей хуагъэзащ, автопавильону 70-м щIигъу ягъэуващ.
«ПсэупIэ» щIыналъэ проектым ипкъ иткIэ щIышылэ - фокIадэ мазэхэм къриубыдэу ухуэныгъэ IуэхущIапIэ зэмы­лIэужьыгъуэхэмрэ цIыхухэмрэ ящIащ метр зэбгъузэнатIэ  мин 460-рэ хъу унэхэр, ар проценти 101,3-кIэ хуокIуэ нэгъабэ и апхуэдэ пIалъэм ирихьэлIэу яхузэфIэкIам».