Пэрытхэм я зэпеуэ

Кэнжэ къуажэм дэт «Пять колец» спорт ­ака­демием футбол цIыкIумкIэ республикэ зэ­хьэзэхуэ мы гъэм етIуа­нэу щекIуэкIащ. «Бутса Первых» зыфIаща а зэпеуэр къы­зэригъэпэ­щащ «Пэ­рытхэм я зэщIэхъее­ныгъэм» и Къэ­бэрдей-Балъкъэр къудамэм, ­КъБР-м ЩIалэгъуалэм я IуэхухэмкIэ, СпортымкIэ и министерствэхэмрэ КъБР-м Фут­болымкIэ и федерацэмрэ къы­дэ­Iэпыкъуу. 

Мыгъэрей зэхьэзэхуэм хэтащ республи­кэм и курыт еджапIэхэмрэ колледж­хэмрэ я ко­мандэ 200-м нэблагъэ. Япэ­щIыкIэ ахэр щызэпеуащ ­къалэ, район зэхьэзэхуэхэм икIи абыхэм щытекIуахэр финалым икIащ, нэхъ лъэщыр респуб­ликэ зэхьэзэхуэм адэкIэ щызэхагъэкIыну. 
- Футболым спорт лIэужьыгъуэхэм я деж бжьы­пэр щиIыгъщ, - жиIащ «Пэрытхэм я зэщIэхъееныгъэм» и Къэбэрдей-Балъкъэр щIыналъэ къудамэм и уна-фэщI Шыпш Аслъэн. - Абы къыдэкIуэу, футболыр философие псо мэхъу, цIыху мелуанхэр, уеблэмэ мелардхэр къызэ­щIиубыдэу. Абы са­бийхэм гъэсэныгъэрэ хьэл-щэнрэ яхелъхьэ, ахэр зэ­къуегъэувэ, гуп хэ­ты­кIэм хуегъасэ. 
Къыхэдгъэщынщи, мы гъэм зэ­хьэ­зэхуэм н­эхъри зрагъэубгъуащ: цIыху бжыгъэу минитIым нэблагъэ абы зэ­рыхэтам и мызакъуэу, ­нэхъ лъэщхэр гупитIым щызэхагъэкIащ - илъэс 12 - 13 ­хъухэмрэ илъэс 14 - 17 зи ныбжьхэмрэ я деж. 
НэхъыщIэхэм ирагъэкIуэкIа кIэух зэIущIэм ­командищ щызэпеуащ. Ахэр Нарткъалэ и лицей №1-м, Прохладнэ къалэм и «Молния», ­Бахъсэн ­къалэм и курыт еджапIэ №8-м я топ­джэгу гупхэрщ. Япэ увыпIэр прохладнэдэсхэм къахьащ. 
Прохладнэ къалэм и администрацэм и тхьэмадэ Кожухов Кирилл фIыщIэ ­яхуищIащ курыт еджапIэ №5-м и уна­фэщIхэмрэ тренерхэмрэ, абыхэм я гъэ­сэнхэм я ехъулIэныгъэм папщIэ. 
«Топджэгу ныбжьыщIэхэм яжесIэну сы­хуейщ: Прохладнэ къалэ админист­рацэм хабзэ къыщокIуэкI - сыт хуэдэ зэхьэзэхуэ ирехъуи, абы щыте­кIуахэр зыхуэпабгъэхэр яхуэдгъэзащIэуи, ноби ды­хьэзырщ фэри фи хъуэпсапIэхэм фылъэдгъэIэ­сыну. Апхуэдэуи, сыхуейщ нобэрей фи текIуэныгъэм ехъулIэныгъэ нэхъ иныжхэр адэкIи къри­кIуэну», - къыхигъэщащ Кожуховым. 
НэхъыжьыIуэхэм ирагъэкIуэкIа кIэух зэхьэ­зэхуэм щызэхуэзащ япэ увыпIэр ­нэгъабэ къэ­зыхьа, Дзэлыкъуэ щIыналъэм и Сэрмакъ къуа­жэм и «Союз»-мрэ Налшык къалэм и курыт еджапIэ №33-мрэ я топджэгухэр. Мыбдежым, бжыгъэр  3:1-уэ налшыкдэсхэм зэIущIэр яхьащ. 
«Фи зэманыр лейуэ фымыгъакIуэ, зывгъасэ, фе­джэ, абы щхьэкIэ фызыхуеину хъуар щы­Iэщ, егъэджакIуэхэр, тренерхэр къывдэIэпы­къуну, гъуэгу захуэм фыт­рагъэувэну хъэзырщ», - жиIащ КъБР-м спортымкIэ и министрым и ­къуэдзэ Хэжь Заур, къыхэжаныкIахэр щагъэпажэм ­щыгъуэ.
Абы нэмыщI, зэхьэзэхуэхэм хэта гупитIым я ­гъуащхьэтетхэмрэ гъуащхьауэ­хэмрэ я нэ­хъыфI­хэр къыхахащ. Нэхъы­щIэхэм я деж гъуа­щхьэтет нэхъыфIу къыщалъытащ Бахъсэн ­къалэм и курыт еджапIэ №8-м и командэм щыщ Хьэ­жьы­рокъуэ Къаплъэн, гъуащхьауэ нэхъыфIыр прохладнэ­дэсхэм я «Молния»-м щыщ топджэгу Погромский Кириллщ. 
Нэхъыжьхэм я деж гъуащхьэтет нэхъы­фIу къыщалъытащ Налшык и курыт еджапIэ №33-м и топ­джэгу Гергоков ­Дамир, гъуащ­хьауэ нэхъыфIыр Сэр­макъым и «Союз»-м хэт Къардэн Азэ­мэтщ.