ПсэукIэр егъэфIэкIуэным пащэ

Налшык къалэ администрацэм щекIуэкIащ цIыхубэм я псэукIэр егъэфIэкIуэным хуэ­щIауэ къалэм 2030 гъэ пщIондэ зэрызрагъэужьыну щIы­кIэм теухуа зэIущIэ. КъБР-м и Правитель­ствэм и УнафэщI Мусуков Алий иригъэкIуэкIа зэхуэсым хэтащ Налшык къалэ администрацэм и УнафэщI Ахъуэхъу Таймураз, КъБР-м ухуэныгъэмрэ псэупIэ-коммунальнэ хозяйствэмкIэ и министр Журавлёв Андрей, министрхэм­рэ министрхэм я къуэдзэ­хэмрэ. 

Налшыкдэсхэм я псэу­-кIэр тынш щIыным теухуауэ япэу зыхэплъа Iуэхугъуэм куэд къызэщIеубыдэ. Абы тепсэ­лъы­хьащ КъБР-м экономикэ зыужьыныгъэмкIэ и минист­рым и къуэдзэ ТIымыжь Хъусен. Абы къыхигъэщ республикэм и щIыналъэ 13-м 2030 гъэ пщIондэ псэукIэр процент 30 хуэдизкIэ щегъэфIэкIуэн къалэныр къазэрыпэщылъыр, псом япэуи а Iуэхухэр Налшык къалэм зэрыщекIуэкIынур. ПсэукIэр егъэфIэкIуэныр Iуэхугъуэ 15-кIэ къалъытэ, къэпсэ­лъам къызэрыхигъэщамкIэ. Ап­хуэдэщ, цIыхухэм я псэу­пIэхэр нэхъ Iэхуитлъэхуит щIы­ныр, жьы хъуа унэхэм щIэсхэр къыщIэгъэIэпхъукIыныр, псэу­пIэ-коммунальнэ Iуэхутхьэбзэ­хэр егъэфIэкIуэныр, унэхэм интернет щIэшэныр, хабзэм ­къе­мызэгъыу къагъэунэхуа пхъэн­кIий идзыпIэхэр Iухы­жы­ныр, цIыхубэ транспортхэм я щытыкIэм кIэлъыплъыныр, егъэ­джэныгъэм, медицинэм, спортым пыщIа IуэхущIапIэхэр, сабий садхэр зыхуей хуэзэу къызэгъэпэщыныр, щэнхаб­зэм­кIэ унэхэмрэ библиотекэ­хэмрэ зыхуей хуэгъэзэныр. 
ЗэIущIэм къыщаIэтащ нэ­гъуэщI Iуэхухэри: 2025 гъэм ­КъБР-м щагъэзащIэ лъэпкъ проектхэр; Налшык къалэм щыIэ псэукIэм и фIагъым хэгъэхъуэнымкIэ Iэмалхэр; республикэм и къалэхэмрэ щIы­налъэхэмрэ щрагъэкIуэкI лэ­жьыгъэхэм епхауэ нэхъыщхьэу зэфIэхыпхъэхэр. 
ПсэупIэхэм интернет ешэ­лIэным и IуэхукIэ ТIымыжьым къыхигъэщащ унэхэр къы­зы­хуэ­тыншэу интернет зэрыщIашэ кIапсэхэмкIэ къызэрызэгъэ­пэщар, къэнэжыр ар пыщIауэ гъэлэжьэныр аркъудейр зэ­рыарар. 
Хабзэм къемызэгъ пхъэнкIий идзыпIэхэм ятеухуауэ къыхигъэщащ апхуэдэ зы щIыпIэ нэгъабэ ­лъандэрэ зэрыщыIэр, ар 2029 гъэ пщIондэ ягъэсеижын зэры­хуейр. 
Абы теухуауэ Мусуковым жиIащ, зи гугъу ящIа пхъэнкIий идзыпIэм нэмыщI, ЩIыуэпс ­хъугъуэфIыгъуэхэмрэ эколо­гиемкIэ  министерствэм уна­фэ тращIыхьын хуейуэ иджыри тIу къызэригъэлъагъуэр. 
Налшык къалэм спорт хуэIу­хуэщIэхэр къыщызэгъэпэ­щы­ным теухуа Iуэхум щытеп­сэ­лъыхьам, Правительствэм и УнафэщIым жиIащ зи узыншагъэр езыгъэфIэкIуэну гупыж зыщI цIыхухэм я псэу­пIэм къыщIэкIрэ дакъи­къэ 15 нэхъыбэ лъэсу мыкIуэу, ­тыншу спорткIэ зыщытригъэун щIыпIэ щыIэн хуейуэ къызэрилъытэр. 
- Спорт Iуэху зэрахуэну гу­къы­дэж зиIэхэм апхуэдэ Iэмал етын хуейщ. Хэт лъакъуэрыгъа­жэкIэ къи­жыхьынщ, хэт и Iэпкъ­лъэп­къым зригъэшэ­щIынщ, хэт къикIухьынщ, - жиIащ Му­суковым икIи къыхигъэщащ а Iуэхум зэрыкIэлъыплъынур. 
Налшык къалэм щэнхабзэмкIэ дэт IуэхущIапIэхэм, абыхэм я щытыкIэхэм, гулъытэ зыхуэ­щIыпхъэхэм ятеухуауэ къэпсэ­лъащ КъБР-м щэнхабзэмкIэ и министрым и къуэдзэ Карчаевэ Аминэ. Абы жиIащ икIэ­щIыпIэкIэ елэжьын хуейуэ IуэхущIапIитI зэрыщыIэр - Лъэпкъ библиотекэмрэ филармонием и унэу щытамрэ. Къэпсалъэм зэрыжиIамкIэ, ­къалэм дэт адрей библиоте­кэхэр зыхуей хуэзэу мэлажьэ, библиотекищ «модельнэ» лIэу­жьыгъуэ ящIащ, зыхуеинухэмкIэ къызэрагъэпэщри. Карчае­вэм жиIащ къалэм унагъуэ­хэм папщIэ библиотекэ дэтамэ, абыи тхылъым и пщIэр зэри­Iэтынур. 
Республикэм и щIыналъэхэм щекIуэкI лэжьыгъэм теухуауэ зэIущIэм къыщытеувыIащ ­гъуэгу Iуэхум, пхъэнкIий идзы­пIэхэм, лэжьапщIэм, псэупIэ­хэм газыр зэрешэлIам, егъэ­джэныгъэм, «Пушкиным и картэм», нэгъуэщIхэми.