ЛIыхъужьым и фэеплъу

Урысей Федерацэм и ЛIыхъужь Тэмазэ Тимур и фэеплъу, бэнэкIэ хуитымкIэ Кубокыр къэхьыным хуэунэтIа зэхьэзэхуэр иджы ещанэу щызэхашащ Прохладнэ щIыналъэм щыщ Къэрэгъэш къуажэм. Абы щызэпеуащ Къэбэрдей-Балъкъэрымрэ Къэрэшей-Шэрджэсымрэ я командэу 7. 
ЗэIущIэр зэрекIуэкIам кIэлъыплъащ Тэмазэ лъэпкъым я нэхъыжьхэр, дзэ Iуэху хэхам лIыхъужьыгъэ зэрихьэу зи псэр щызыта Тимур и унагъуэр, Iыхьлыхэмрэ благъэхэмрэ, район, къуажэ администрацэхэм я унафэщIхэр, дзэм, Урысей гвардием, МВД-м къулыкъу щезыхьэкIхэр, депутатхэр, жылагъуэ лэжьакIуэхэр, къуажэдэсхэр, спортым дихьэххэр.
ГъэщIэгъуэну икIи гуащIэу екIуэкIа зэIущIэхэм къарикIуахэр зэхалъхьэжа нэужь наIуэ къызэрыхъуамкIэ, я хьэлъагъ елъытауэ зыхэта гупхэм щытекIуащ бэнакIуэ 25-рэ икIи медалхэмрэ щIыхь тхылъхэмрэ къадэкIуэу абыхэм иратащ чемпионхэм я бгырыпххэр. ЕтIуанэ, ещанэ увыпIэхэр зыубыдахэр цIыху 75-рэ мэхъу. Техникэ нэхъыфI зиIэу зэхьэзэхуэм къыщалъыта бэнакIуищым щхьэхуэу Кубокхэр хуагъэфэщащ.