Спорт хъыбархэр

Дамир дуней псом и чемпионщ!

Рязань къалэм единоборствэхэмкIэ и спорт академием щэкIуэгъуэм и 6 - 9-хэм Iэпщэрыбанэ зауэмкIэ дунейпсо чемпионат щекIуэкIащ. Абы щызэхуэсащ къэрал 30-м я спортсмен лъэщу 200-м щIигъу.

Ди гуапэ зэрыхъущи, Урысей Федерацэм и командэ къыхэхам хэту зэхьэзэхуэм щызэуа, Къэбэрдей-Балъкъэрым и гъэсэн Къэзан Дамир ди республикэм дыщэ медаль къыхуихьащ. Килограмм 62-рэ зи хьэлъагъхэм я деж зыкъыщызыгъэлъагъуэ адыгэ щIалэм и хьэрхуэрэгъухэм зы Iэмали яритакъым къытекIуэну. Дуней псом и чемпион цIэ лъапIэм къыдэкIуэу, Къэзан Дамир къыхуагъэфэщащ УФ-м дунейпсо классымкIэ спортым и мастер дамыгъэри.

ЩIалэм дэлажьэр Къулъкъужын Ищхъэрэм щыщ тренер Дыджэ Алимщ.

Кубокыр налшыкдэсхэм яхь

Комсомолым и махуэр ягъэлъапIэу Налшык къалэм футболымкIэ и спорт еджапIэм и Кубокыр футбол «цIыкIумкIэ» къэхьыным хуэунэтIа урысейпсо зэхьэзэхуэ республикэм и къалащхьэм щрагъэкIуэкIащ тхьэмахуэ блэкIам. Абы щызэпеуащ 2014 гъэм къалъхуа топджэгу ныбжьыщIэхэр.

ЗэIущIэр къызэригъэпэщащ Налшык къалэ администрацэм физкультурэмрэ спортымкIэ и управленэм и нэIэ щIэту лажьэ футбол спорт еджапIэм и унафэщI, КПРФ-м и Налшык комитетым и секретарь Хьэмгъуокъу Мурат.

Спорт еджапIэм и кубокым щIэбэнащ «Азал» (Налшык), «Тэрч» (Тэрч), «Искра-Алътуд» (Алътуд), «Налшык къалэм и курыт еджапIэ №3I» (Налшык), «Олимп» (Бахъсэн), «Форвард» (Бахъсэн), «Шагъдий» (Плановскэ), «ФШ Налшык» (Налшык) командэхэр.

 ГъэщIэгъуэну икIи удэзыхьэхыу екIуэкIа зэхьэзэхуэхэм япэ увыпIэр къыщихьащ «Азал»-м, етIуанэр «ФШ Налшыкырщ», ещанэ хъуар Бахъсэн къалэм и «Олимп»-рщ.

Апхуэдэуи зэхьэзэхуэм щагъэлъэпIащ топджэгу нэхъыфIу къалъытахэр. Гъуащхьэтетхэм я деж щытекIуащ Сэбан Аслъэн  («Азал»), гъуащхьэхъумэ нэхъыфI хъуар «Олимп»-м и топджэгу Iэгуей Рэмэзанщ. Гъуащхьэхъумэныкъуэхэм я деж япэ ирагъэщащ Хъупсырджэн Инал («ФШ Налшык»), гъуащхьауэхэм я нэхъыфIыр Щомахуэ Темырланщ («Тэрч»).

Зэхьэзэхуэм хьэрхуэрэгъухэм я гъуэм топ нэхъыбэ щыдэзыгъэкIар Жанхъуэт ЖэбрэIилщ («Азал»). Зэпеуэ екIуэкIам псом нэхърэ нэхъ топджэгуфIу къыщалъытащ Азычэ Астемыр («Азал»).

Япэ увыпIищыр къэзыхьа командэхэмрэ къыхагъэщхьэхукIа топджэгухэмрэ медалхэмрэ кубокхэмрэ иратащ.

«Кристалл»-р нэхъ лъэщщ

Хабзэ зэрыхъуауэ, УФ-м и Хабзэхъумэ IэнатIэхэм я лэжьакIуэм и махуэр щагъэлъапIэм ирихьэлIэу Налшык къалэм и «Кристалл» спорт комплексым щекIуэкIащ баскетболымкIэ республикэ зэхьэзэхуэ. Абы щызэпеуащ 2012 - 2013 гъэхэм къалъхуа щIалэ цIыкIухэр.

Зэхьэзэхуэр къызэрагъэпэщащ КъБР-м и «Динамо» спорт зэгухьэныгъэмрэ Налшык къалэ администрацэм Физкультурэмрэ спортымкIэ и управленэм и нэIэ щIэту лажьэ баскетболымкIэ спорт еджапIэ №2-мрэ. Зэпеум хэтащ Налшыкрэ Прохладнэрэ я командитI.

Зэхьэзэхуэм кърикIуахэр зэхалъхьэжа нэужь япэ увыпIэр иратащ Тхьэкъуахъуэ Уэсмэн зи тренер «Кристалл» командэм. ЕтIуанэ хъуащ ди къалащхьэм и курыт еджапIэ №7-м и «Кадеты» гупыр. Абы и тренерыр Парамоненкэ Василийщ. Ещанэ увыпIэр къахьащ Прохладнэ къалэм и курыт еджапIэм и гъэсэнхэм. Абыхэм ядэлажьэр Смыгин Игорщ.

Спортсмен нэхъыфIхэу зэхьэзэхуэм къыщалъытащ Пушкарев Ярослав, Текуев Мансур (тIури «Кристалл» командэм ейщ), Анисимов Назар (Прохладнэ къалэ) сымэ.

Зэпеуэм япэ увыпIищыр къыщызыхьахэмрэ къыхагъэщхьэхукIа спортсменхэмрэ медалхэр, щIыхь тхылъхэр, кубокхэр иратащ «Динамо» спорт зэгухьэныгъэм къыбгъэдэкIыу.

   ЩЭУЕЙ Башир.