Бзэм йолэжь

Гъунэгъу республикэхэм анэдэлъхубзэр хъумэным епхауэ щапхъэ зытепх хъун куэд щыболъагъу. Осетие Ипщэ республикэм жэпуэгъуэм и 14-м щекIуэкIащ АнэдэлъхубзэмкIэ езыгъаджэхэм я конференц. Курыт школхэми щIэныгъэ нэхъыщхьэ щрат еджапIэхэми осетиныбзэр щезыгъэджхэр къыщызэхуэсащ Осетие Ипщэм и къэрал университетым.

Конференцыр къыщызэIуихым, университетым и ректор Тедеев Вадим жиIащ: «ЩIэныгъэ нэхъыщхьэ зэзыгъэгъуэтыну хуей ныбжьыщIэхэм я лъэIу тхылъ куэд къытIэрохьэ дэ, IэщIагъэ щхьэхуэхэм хуеджэну хуейуэ. Ауэ абыхэм «Осетиныбзэмрэ литературэмрэ» е «Урысыбзэмрэ литературэмрэ» къудамитIыр къахощ, а лъэныкъуэм ехъуапсэр зэрымащIэмкIэ. Къэтщтапхъэ цIыху бжыгъэр тхуригъэкъуркъым. Гу зэрылъыстэмкIэ, а IэщIагъэфI дыдэхэр къыхэзых студентхэм я бжыгъэм хэхъуэркъым, зэрымащIэу къонэж».

УФ-м и посольствэм и лIыкIуэ Терзиян Игорь зи гугъу тщIы конференцым къыщыщыпсалъэм, къызэхуэсахэм ягу къигъэкIыжащ жэпуэгъуэм и 3-м апхуэдэ дыдэ конференц урысыбзэмрэ литературэмкIэ егъэджакIуэхэм папщIэ зэрекIуэкIар. ЕгъэджакIуэм и махуэм ирихьэлIэу зэхаша а дауэдапщэхэм куэдкIэ къащхьэщокI мы конференцыр, сыту жыпIэмэ, абы республикэм егъэджакIуэу исым я дежкIэ мыхьэнэшхуэ иIэщ.

«Сыт лъэпкъым лъабжьэ хуэхъур? – щIэупщIащ Терзиян икIи езым жэуап иритащ. – Щэнхабзэрщ, гъуазджэрщ, тхыдэрщ, бзэрщ. Осетием къэралыбзэу тIу щолажьэ, КонституцэмкIэ тегъэщIапIэ яIэу: урысыбзэмрэ осетиныбзэмрэ. Урысыбзэм и фIыгъэкIэ Осетие Ипщэм и цIыхубэр абыкIэ зекIуэ щэнхабзэ абрагъуэм лъоIэс. Фэ, егъэджакIуэхэм, жэуаплыныгъэшхуэ фи пщэ дэлъщ, къыдэкIуэтей щIэблэм анэдэлъхубзэр ивогъэдж, ди сабийхэм осетиныбзэм и лъабжьэр зыгъэтIылъа тхакIуэхэмрэ усакIуэхэмрэ я IэдакъэщIэкIхэм зрагъэцIыхуфын хуэдэу».

Осетиныбзэм и Iуэхур республикитIым епхащ, сыту жыпIэмэ, Осетие Ипщэмрэ Осетие Ищхъэрэ – Алание республикэмрэ щыпсэу цIыхубэм зы лъэпкъыу зыкъалъытэж, щIэх-щIэхыури зэкIэлъокIуэ. Ар пхуегъэщхьынущ адыгэ щыпсэу хэгъэгъуищым я зэпыщIэныгъэхэм. Гу лъыптэу, республикитIми я цIыхубэр анэдэлъхубзэм къэрал унафэкIэ игъуэтыпхъэ унафэхэм щIобэн, я жэрдэмхэри пхагъэкI. А псом къадэкIуэу, фокIадэм и 30-м, Осетие Ипщэ республикэр хуит зэрыхъурэ илъэс 30 щрикъум ирихьэлIэу, УФ-м и Президент Путин Владимир я анэдэлъхубзэм зыщиужьын папщIэ, езым и фондым къыхэкIыу, осетиныбзэмрэ литературэмкIэ егъэджакIуэхэм я улахуэм гуэдзэн хуигъэуващ. А хъыбарыр республикэм нэзыхьэса Президентым и лIыкIуэ Кириенкэ Сергей зэрыжиIэмкIэ, Путин Владимир ищIа унафэм ипкъ иткIэ, Осетие Ипщэм дэт школ къэс IэнатIэщIэ къыщызэIуахынущ: сабийхэр гъэсэнымкIэ чэнджэщэгъу, и улахуэр мин 40-м нэсу. КъинэмыщIауэ, урысыбзэмрэ осетиныбзэмрэ езыгъэджхэм мазэ къэс я улахуэм сом мини 5 хущIагъунущ, УФ-м и Президентым и фонд гъэтIылъам къыхахауэ.

Осетиныбзэр къэралыбзэу зэрыщытым кърикIуапхъэ зэхъуэкIыныгъэхэр зэрыпхагъэкIын хабзэр мы илъэсым къыщащтэну я мурадщ Осетие Ищхъэрэ - Аланиеми. Кавказым щыщ адрей республикэхэми ещхьу, осетиныбзэр мыбы къэралыбзэу къыщалъытэ, ауэ жылагъуэ лэжьакIуэхэр аркъудеймкIэ арэзыкъым: «ХабзэкIэ къэрал дэфтэрхэр бзитIымкIи традзэн хуейщ, ауэ Iуэхур тхылъымпIэм нэса нэужь, осетиныбзэкIэ къыдэкI «Хурзæрин» газетым ахэр къызэрытехуэр урысыбзэщ. КъинэмыщIауэ, Парламентми Правительствэми я зэIущIэхэр осетиныбзэкIэ екIуэкIын зэрыхуейр хабзэм итщ, арщхьэкIэ Правительствэм хэтхэр закъуэтIакъуэххэрэщ анэдэлъхубзэкIэ къызэрыпсалъэр».

А псор къыщIедгъэкIуэкI адыгэбзэм дыкъекIуэлIэжмэ, дэри дызэлэжьын ди куэдщ.