Дохутырхэр Мелитополь щыIащ

Лышх узыфэхэмкIэ Ростов къалэм дэт щIэныгъэ IуэхущIапIэм и дохутырхэр иджыблагъэ Запорожье областым щыIащ сымаджэхэм еплъыну.

ЩэкIуэгъуэм и 7-м Лъэпкъ медицинэ IуэхущIапIэм и щIэныгъэлIхэр Мелитополь щеплъащ лышх узыфэ зыпкърытхэм. Абы и хъыбарегъащIэ IуэхущIапIэм къызэритымкIэ, мыпхуэдэ зэдэлэжьэкIэр ростов центрым къыхилъхьауэ, жэпуэгъуэ мазэ лъандэрэ Херсон, Запорожье щIыналъэхэм чэзууэ щокIуэкI.

Мызыгъуэгу Ростов икIри, щIэныгъэлI 11 кIуащ Мелитополь и щIыналъэ сымаджэщым. Абыхэм яхэтщ кIуэцI, тхьэмбыл, щIыфэ, бгъэ, лыпцIэ, щхьэ, пщэ, къинэмыщI лышх лIэужьыгъуэхэмкIэ онкологхэр, нейрохирург, УЗИ зыщI дохутыр.

- Ди дохутырхэр еплъащ цIыху 46-м. Иджыри 20-м УЗИ хуащIащ. А псоми ящыщу цIыху 14-р нэхъ куууэ зыкIэлъыплъыпхъэу къалъытэри, ди щIэныгъэ IуэхущIапIэм кърагъэблэгъащ, мыбдеж дыщеIэзэну, - жиIащ щIэныгъэ центрым и унафэщI, медицинэ щIэныгъэхэмкIэ доктор, профессор, академик Кит Олег.

Гупым хэта нейрохирург Росторгуев Эдуард Мелитополь и щIыналъэ сымаджэщым и нейрохирургхэм щIыгъуу нэхъ сымаджэ хьэлъэхэм я Iуэхум хэплъащ икIи Ростов нэхъ тыншу къызэрагъэIэпхъуэну щIыкIэр яубзыхуащ.

Фырэ Анфисэ.