ЕгъэфIэкIуэным хуэгъэпсауэ

Ди къэралым и щыхьэр Москва КъБР-м и Iэтащхьэ КIуэкIуэ Казбек дыгъуасэ лэжьыгъэ IуэхукIэ щыхуэзащ УФ-м Къызэры-мыкIуэ щытыкIэхэмкIэ и министерствэм (МЧС) и пашэ Куренков Александр. КъулыкъущIэхэр тепсэлъыхьащ ди щIыналъэм и МЧС IэнатIэр адэкIи егъэфIэкIуэным, ди деж зи нэгу зыщезыгъэужьхэм шынагъуэншагъэ къахузэгъэпэщыным, нэгъуэщI­хэми. 

ЗэIущIэм зэрыщыжаIамкIэ, Къэбэрдей-Балъкъэрым зыгъэ­псэхуакIуэ къакIуэхэм, щIыпIэм щыпсэухэм я шынагъуэншагъэр къызэрагъэпэщ УФ-м и МЧС-м Iуащхьэмахуэ лъапэ щиIэ къэлъыхъуакIуэ-къегъэлакIуэ гупым: IэщIагъэлI 90-рэ техникэ хэхауэ 47-рэ. Гупым я хэщIапIэр Терскол жылэращ. Абы и нэIэм щIэтщ рес-публикэм и щIыпIэ псори, Кавказ бгы щыгум и Iыхьэшхуэ, бгы ­лъагэ абрагъуэу тху хиубыдэу. ЗыгъэпсэхуакIуэ къакIуэхэм абы ехьэлIа щIэныгъэрэ зэфIэкIрэ ябгъэдэлъыпхъэщ. Аращ шына­гъуэншэ нэгузегъэужьым и джэлэс нэхъыщхьэр. 
Дызэрыт илъэсым къриубыдэу къэлъыхъуакIуэ-къегъэлакIуэ гу-пым апхуэдэ Iуэхуу 125-рэ зэфIахащ, бгылъэхэм щыщыIэ щIыуэпс щытыкIэ къызэрымыкIуэм хэту. ЦIыхуи 157-рэ кърагъэлащ. 
Къыхэгъэщыпхъэщ Iуащхьэмахуэ лъапэ зыгъэпсэхупIэ цIэрыIуэу зэрыщытыр. Мы илъэсым къриубыдэу абы я нэгу зыщрагъэужьа­кIэщ цIыху мелуанрэ ныкъуэм щIигъум. Ахэр щызокIуэ псори зэхэту километр минрэ ныкъуэм нэс зи кIыхьагъ турист лъа­гъуэу 57-м. А гъуэгухэм мы гъэм зэпачащ нэгузегъэужь IуэхукIэ ди щIыналъэм къэкIуа цIыху мини 10-м щIигъу. 
КъБР-м и Iэтащхьэ КIуэкIуэ Казбек УФ-м и МЧС-м и пашэ Куренков Александр фIыщIэ хуищIащ щIыналъэм щыпсэухэм, абы зыгъэпсэхуакIуэ къакIуэхэм я шынагъуэншагъэр къызэгъэпэщыным къыхуищI гулъытэ хэхам папщIэ.