IэмалыщIэхэр жану къагъэщхьэпэ

КъБР-м и Iэтащхьэ КIуэкIуэ Казбек Налог къулыкъущIапIэм и ветеранхэмрэ лэжьакIуэхэмрэ ехъуэхъуащ налог къыхэзых органхэр илъэс 35-рэ зэрырикъуамкIэ. 

«Къэбэрдей-Балъкъэрым и налог къулыкъущIапIэм и ветеранхэу, и лэжьакIуэхэу пщIэ зыхуэсщIхэ! Си гуми си псэми къабгъэдэкIыу сынывохъуэхъу Урысейм и налог органхэр къызэрыу­нэхурэ илъэс 35-рэ зэрырикъуамкIэ, фи IэщIагъэм и махуэр зэрывгъэлъапIэмкIэ. 
Урысейм и Къэрал налог къулыкъущIапIэр (ФНС) сэбэпынагъышхуэ къэзыхь, налогхэмрэ къыхэхыпхъэхэмрэ епха хабзэхэр гъэзэщIа хъуным кIэлъыплъ къэрал политикэм зезыгъэубгъу IуэхущIапIэ нэхъыщхьэ хъуащ илъэс блэкIахэм. 
Фи IэщIагъэм фIыуэ зэрыхэфщIыкIым, фи къалэнхэр нэгъэсауэ зэрывгъэзащIэм елъытащ къэрал мылъкуми республикэм и ­бюджетми хэхъуэу иIэнур зыхуэдизри, мыхьэнэшхуэ зиIэ проектхэмрэ цIыхубэ программэхэмрэ гъэзэщIа зэрыхъури, инвестицэхэм я зекIуэкIэри, хьэрычэт щIэным хуэщхьэпэ Iуэху зехьэкIэм зэрызиубгъури. 
Нобэ фэ жыджэру фогъэзащIэ фи пащхьэ кърагъэувэ къалэнхэр, зэманым къыздихь IэмалыщIэхэри жану къывогъэщхьэпэ. А псом я фIыгъэкIэ бюджетри, цIыхухэм ягъуэт Iуэхутхьэбзэхэри, хьэрычэтым къыхэхъуэ мылъкури нэхъыбэ мэхъу. 
Жэуаплыныгъэ фхэлъу, фи къалэныр нэгъэсауэ зэрывгъэзащIэм, Къэбэрдей-Балъкъэрым и гъащIэмрэ абы щыпсэу цIыхухэм я псэукIэмрэ яхуэфIщ хэлъхьэныгъэм папщIэ фIыщIэшхуэ фхузощI. Узыншагъэ быдэрэ ехъулIэныгъэшхуэрэ фиIэу, дэтхэнэ зыри фи IэнатIэм фыщефIакIуэу, Хэкум и пщIэр фIэту фылэжьэну гурэ псэкIэ сынывохъуэхъу».