IэнатIэкIэ къызэрагъэпэщ

«Къуажэ дохутыр/фельдшер», «Къуажэ егъэджакIуэ», ­«Къуажэм щэнхабзэмкIэ и лэжьакIуэ» къэрал программэхэм я фIыгъэкIэ мы гъэм ди республикэм IэнатIэкIэ къыщызэрагъэпэщащ IэщIагъэлI 40. 

ЩIышылэ мазэм щыщIэдзауэ «Къуажэ дохутыр/фельдшер» программэмкIэ район медицинэ IуэхущIапIэхэм ягъэкIуащ ­дохутыр 16-рэ фельдшери 7-рэ. Илъэсым и кIэ пщIондэ иджыри IэщIагъэлIи 7 IэнатIэкIэ къызэрагъэпэщынущ. Программэр 2019 гъэ лъандэрэ мэлажьэ, а зэманым къриубыдэу дохутыррэ фельдшеру 228-м IэнатIэ иратащ. 
«Къуажэ егъэджакIуэ» программэр Къэбэрдей-Балъкъэрым 2020 гъэ лъандэрэ щагъэзащIэ. Илъэситхум къриубыдэу республикэм и школхэм егъэджакIуэ 41-рэ къахэхъуащ. Ди Президент Путин Владимир и унафэкIэ программэм 2030 гъэ пщIондэ къыпащэнущ. 2026 гъэм республикэм и школхэм егъэджакIуэ 18 ягъэкIуэнущ, 2027 гъэм - IэщIагъэлI 19. Мы гъэм а программэмкIэ Прохладнэ, Шэджэм, Бахъсэн, Май районхэм егъэджакIуи 9-м лэжьэн щыщIадзащ. Курыт школхэр нэхъыбэу хуэныкъуэщ математикэмкIэ, инджылызыбзэмкIэ, тхыдэмкIэ, биологиемкIэ, урысыбзэмрэ литературэмкIэ егъэджакIуэхэм, апхуэдэуи пэщIэдзэ классхэм щезыгъэджэнухэм.
2025 гъэм и шыщхьэуIу мазэм наIуэ къащIащ къуажэхэмрэ къалэ цIыкIухэмрэ щылэжьэну щэнхабзэм и IэщIагъэлIхэр къыщыхаха зэпеуэм кърикIуахэр. Зэуэ ят ахъшэр яIэрыхьэнущ IэщIагъэлIи 8-м. Абыхэм яхэтщ макъамэмкIэ, къафэмкIэ егъэджакIуэхэр, театр гупжьейхэр езыгъэкIуэкIынухэр, художественнэ унафэщIхэр. Апхуэдэ IэщIагъэлIхэмкIэ къызэрагъэпэщынущ Бахъсэн, Лэскэн, Прохладнэ, Тэрч, Iуащхьэмахуэ районхэм ЩэнхабзэмкIэ я IуэхущIапIэхэр.
2026 гъэм лэжьэн щIидзэнущ IэщIагъэлI ныбжьыщIэхэр дэIыгъынымкIэ, ахэр IэнатIэкIэ къызэгъэпэщынымкIэ «Къуажэ тренер» къэрал программэщIэм. 
Ахэр псори IэмалыфIщ къуажэхэм узыншагъэр хъумэн, егъэджэныгъэ, щэнхабзэ IэнатIэхэм зыщаужьынымкIэ.