Спорт хъыбархэр

Багъ Алий къыпэхъун къахэкIакъым

«Abu Dhabi World Professional Jiu-Jitsu Championship» фIэщыгъэр зэрихьэу бразилхэм я джиу-джитсу спорт лIэужьыгъуэмкIэ дунейпсо зэхьэзэхуэ щекIуэкIащ Хьэрып Эмират Зэгуэтхэм я къалащхьэ Абу-Даби и «Mubadala Arena» спорт комплексым. Абы щызэпеуащ къэрал куэдым я спортсмен лъэщу 3000-м щIигъу.

Ди гуапэ зэрыхъущи, Къэбэрдей-Балъкъэрым и бэнакIуэ, бахъсэндэс щIалэ Багъ Алий килограмм 85-рэ зи хьэлъагъхэм я деж япэ увыпIэр щиубыдащ. Къыхэдгъэщынщи, Абу-Даби абы щригъэкIуэкIа зэIущIитхум къриубыдэу зы балл закъуэ и хьэрхуэрэгъухэм яритакъым икIи псори зэхэту 45:0-у ахэр къихьащ. Абы нэмыщI, а зэIущIитхум щыщу щым щытекIуащ, зэпеуэхэм хухаха зэманхэр и кIэм нимыгъэсу

Багъ Алий «ACB», «ACA» зэзауэ зыхэт спорт лIэужьыгъуэхэм я лигэхэм я чемпионщ, грэпплингымкIи джиу-джитсумкIи дунейпсо зэхьэзэхуэхэр мызэ-мытIэу къихьащ. 

Улымбащыр нэхъ лъэщщ

Якутск къалэм и «Триумф» спорт комплексым иджыблагъэ щекIуэкIащ бэнэкIэ хуитымкIэ спортсмен цIэрыIуэу щыта Крылов Александр и фэеплъ зэхьэзэхуэ. Абы щызэпеуащ Якутием, Бурятием, Тывам, Осетие Ищхъэрэ – Аланием, Къэбэрдей-Балъкъэрым, Байкал адрыщI, Красноярск, Хабаровск крайхэм, Новосибирск, Иркутск, Кемеровэ областхэм, Монголиемрэ Таджикистанымрэ я бэнакIуэу I50-м щIигъу.

Ди республикэм и щIыхьыр иIэту зэхьэзэхуэм хэтащ Улымбащ Азрэт икIи, ди гуапэу къыхэдгъэщынщи, килограмм 86-рэ зи хьэлъагъхэм я деж абы дыщэ медаль къыщихьащ. КIэух зэхьэзэхуэм ди щIалэм хигъэщIащ Монголием и бэнакIуэ Бат-Эрдэне Буямдорж, зэIущIэм и бжыгъэр 10:0-у.

Сатушы Мадинэ и дыщэ медалыр

Японием и Токио къалэм къикIыу хъыбар гуапэ къытIэрыхьащ.

Мы махуэхэм абы щекIуэкIа Сурдлимп джэгухэм (тэмэму зэхэзымыххэм я дунейпсо зэхьэзэхуэм) Къэбэрдей-Балъкъэрым и спортсменкэ, Кэнжэ къуажэм дэт «Пять колец» спорт академием и гъэсэн Сатушы Мадинэ, Урысей Федерацэм и командэ къыхэхам хэту дыщэ медаль тхэквондомкIэ (ВТФ – Олимп джэгухэм хыхьэ лIэжьыгъуэмкIэ) къыщихьащ, ари ди къэралым и тхыдэм щыяпэу. Ди адыгэ пщащэм ипэкIэ а спорт лIэужьыгъуэмкIэ апхуэдэ зэфIэкI къэзыгъэлъэгъуа бзылъхугъэ УФ-м иIакъым.

Килограмм 49-рэ зи хьэлъагъхэм я деж зыкъыщызыгъэлъагъуэ Сатушым финалым ерыщу къыщыпэщIэтащ Узбекистаным и спортсменкэ Тоджибоевэ Дильбор, ауэ къызэрытекIуэн Iэмал иримыту, дыщэ медалыр абы къыфIихьащ.

Мадинэ дэлажьэр УФ-м щIыхь зиIэ и тренер Ахъмэт Амирщ.

Мыдрейуэ, иджырей Сурдлимп джэгухэм щызэпеуащ къэрал 78-м я спортсмену, щIалэхэри хъыджэбзхэри зэхэту, 2836-рэ. Урысей Федерацэм ейуэ абы щыIащ цIыху 36-рэ.

Фыщыдгъэгъуэзэнщи, Сурдлимп джэгухэр япэ дыдэу щрагъэкIуэкIар 1924 гъэм Франджым и Париж къалэрщ. Абы лъандэри, Олимп джэгухэм хуэдэу, илъэсиплI къэс зэ ахэр ирагъэкIуэкI, щIымахуэми гъэмахуэми спорт лIэужьыгъуэхэмкIэ щхьэхуэу, щызэпеуэхэри, олимпиадэм хуэдэу, къэралхэм я спортсмен нэхъ лъэщ дыдэхэращ.